Gujarat Congress Opposition Leader:સ્થાનિક ચૂંટણીને બે મહિના છતાં કોંગ્રેસમાં વિપક્ષી નેતાની પસંદગી અટકી

સ્થાનિક ચૂંટણી બાદ ભાજપે (BJP) જ્યાં મેયર, ડેપ્યુટી મેયર તેમજ વિવિધ સમિતિઓના ચેરમેનની નિમણૂક કરીને વહીવટી કામગીરી શરૂ કરી દીધી છે, ત્યાં કોંગ્રેસ (Gujarat Congress Opposition Leader) હજુ પોતાના સંગઠનાત્મક મુદ્દાઓ ઉકેલવામાં વ્યસ્ત હોવાનું જોવા મળી રહ્યું છે. પરિણામે જ્યાં વિપક્ષ તરીકે પૂરતું સંખ્યાબળ છે, ત્યાં પણ વિપક્ષી નેતાનું પદ હજુ ખાલી છે.

માહિતી મુજબ અમદાવાદ, રાજકોટ, વડોદરા, ભાવનગર, જામનગર, વાપી અને ગાંધીધામ સહિત કુલ આઠ મહાનગરપાલિકાઓમાં કોંગ્રેસ પાસે વિપક્ષી નેતા નિયુક્ત કરવા માટે જરૂરી સંખ્યાબળ છે. છતાં ઉમેદવારીને લઈને આંતરિક સહમતિ ન બનતા નિર્ણય લંબાઈ રહ્યો છે.

અમદાવાદ મહાનગરપાલિકામાં પણ વિપક્ષી નેતાના પદ માટે એકથી વધુ દાવેદારો હોવાના કારણે સ્થિતિ વધુ જટિલ બની છે. કેટલાક નેતાઓ પોતાના જૂથના કોર્પોરેટરને પદ અપાવવાનો પ્રયાસ કરી રહ્યા હોવાનું ચર્ચાઈ રહ્યું છે. આ કારણે પ્રદેશ સ્તરની નેતાગીરી માટે પણ સંતુલન જાળવી નિર્ણય લેવો પડકારરૂપ બન્યો છે.

ગુજરાતમાં કુલ 15 મહાનગરપાલિકાઓ છે. તેમાં કેટલીક જગ્યાએ કોંગ્રેસ (Gujarat Congress Opposition Leader) પાસે કાયદેસર વિપક્ષનું સ્થાન મેળવવા જેટલું પણ સંખ્યાબળ નથી, જ્યારે જ્યાં વિપક્ષ તરીકેની ભૂમિકા ભજવવાની તક મળી છે ત્યાં નેતૃત્વ નક્કી કરવામાં વિલંબ થઈ રહ્યો છે. આ સ્થિતિ કોંગ્રેસના સંગઠન અને નેતૃત્વ અંગે પણ અનેક સવાલો ઉભા કરી રહી છે.

રાજકીય વિશ્લેષકોનું માનવું છે કે વિપક્ષી નેતાની સમયસર નિમણૂક ન થવાને કારણે સ્થાનિક સ્તરે જનતાના પ્રશ્નોને અસરકારક રીતે રજૂ કરવામાં મુશ્કેલી ઊભી થઈ શકે છે. બીજી તરફ ભાજપે પોતાની વહીવટી વ્યવસ્થા મજબૂત બનાવી દીધી હોવાથી કોંગ્રેસ (Gujarat Congress Opposition Leader) માટે હવે આંતરિક એકતા સ્થાપિત કરીને સક્રિય વિપક્ષની ભૂમિકા નિભાવવાનો પડકાર વધુ મોટો બની રહ્યો છે.