Uttar Pradesh News : ઉત્તર પ્રદેશના કાનપુરમાંથી એક અત્યંત દર્દનાક અને મોટા અકસ્માતના સમાચાર સામે આવ્યા છે. ગુરુવારે બપોરના સમયે કાનપુરના ગંગા કિનારે આવેલા નથ્થા પુરવા ગામ નજીક એક ટ્રેનિંગ પ્લેન અચાનક દુર્ઘટનાગ્રસ્ત (Plane crashed ) થઈને જમીન પર પટકાયું હતું. હવામાં જ પ્રચંડ ધડાકા સાથે વિમાન નીચે પડતાં આસપાસના ગ્રામીણ વિસ્તારોમાં ભારે અફરાતફરી મચી ગઈ હતી અને લોકો ડરના માર્યા ઘરોમાંથી બહાર દોડી આવ્યા હતા.

1 પાયલટનું ઘટનાસ્થળે જ મોત, બીજાને ગંભીર હાલતમાં હોસ્પિટલ ખસેડાયો

આ કરૂણ દુર્ઘટના (Accident)માં એક પાયલટે કમનસીબે ઘટનાસ્થળે જ દમ તોડી દીધો હતો. દમ તોડનર પાઇલટ ગુજરાતી હોવાનું સામે આવ્યું છે. જ્યારે બીજા પાયલટને કાટમાળમાંથી અત્યંત ગંભીર હાલતમાં બહાર કાઢવામાં આવ્યો હતો. સ્થાનિક રહીશોએ તુરંત જ પોલીસ અને સ્થાનિક પ્રશાસનને જાણ કરી હતી, જેના પગલે એમ્બ્યુલન્સ અને રાહત ટીમો સ્થળ પર પહોંચી ગઈ હતી. ઈજાગ્રસ્ત પાયલટને તાત્કાલિક સારવાર અર્થે નજીકની હોસ્પિટલમાં દાખલ કરવામાં આવ્યો છે. અકસ્માતના સમાચાર પ્રસરતાં જ ઘટનાસ્થળે ગ્રામજનોના ટોળેટોળાં ઉમટી પડ્યા હતા, જેને દૂર કરવા પોલીસે સમગ્ર વિસ્તારને સીલ કરી દીધો હતો.

બ્લેક બોક્સ અને ટેકનિકલ ખામી અંગે તપાસના આદેશ

આ વિમાન દુર્ઘટના પાછળનું સાચું કારણ શું હતું, હવામાંજ વિસ્ફોટ કેમ થયો અને શું એન્જિન (Engine)માં કોઈ ટેકનિકલ ખામી સર્જાઈ હતી કે કેમ તે તમામ પાસાઓ પર પ્રશાસન અને એવિએશન ટીમોએ ઊંડી તપાસ શરૂ કરી દીધી છે. ઉલ્લેખનીય છે કે, તાજેતરમાં જ અલાસ્કાના મિલિટરી એરપોર્ટ પર પણ ખરાબ હવામાન અને ઝાંખા વિઝિબિલિટીના કારણે એક વિમાન દુર્ઘટનાગ્રસ્ત થતાં 8 લોકોના મોત થયા હતા, ત્યારે કાનપુરની આ ઘટનાએ દેશમાં પાયલટ તાલીમ સુરક્ષા સામે ફરી એકવાર સવાલો ઊભા કર્યા છે.