New Delhi News: દેશમાં મોંઘવારીને લઈને રાજકીય ગરમાવો ફરી વધ્યો છે. કોંગ્રેસે કેન્દ્ર સરકાર પર આકરો પ્રહાર કરતાં આરોપ લગાવ્યો છે કે સરકાર મોંઘવારીની (India Inflation) વાસ્તવિક અસર પરથી લોકોનું ધ્યાન હટાવવા માટે આંકડાઓની રમતનો સહારો લઈ રહી છે. કોંગ્રેસના જણાવ્યા મુજબ, મોંઘવારીનો બોજ હવે માત્ર રસોડા પૂરતો સીમિત રહ્યો નથી, પરંતુ ઘર બનાવવાથી લઈને રોજિંદા ઉપયોગની વસ્તુઓ સુધી તેની અસર જોવા મળી રહી છે.

ઘર બનાવવાનો ખર્ચ વધ્યો હોવાનો દાવો

કોંગ્રેસના નેતાએ મકાન બાંધકામમાં ઉપયોગમાં લેવાતી વિવિધ સામગ્રીની કિંમતોમાંવધારો થયો હોવાનો દાવો કર્યો છે. તેમના જણાવ્યા પ્રમાણે તાંબાના તારની કિંમત પ્રતિ કિલોગ્રામ રૂ.850થી વધીને રૂ.1,700 સુધી પહોંચી છે. તે જ રીતે એલ્યુમિનિયમની કિંમત રૂ.350થી વધીને આશરે રૂ.650 પ્રતિ કિલોગ્રામ થઈ હોવાનો પણ તેમણે દાવો કર્યો છે.

જયરામ રમેશે દાવો કર્યો કે કિંમતોમાં થયેલા વધારાની સીધી અસર મકાનના ઇલેક્ટ્રિક વાયરિંગના ખર્ચ પર પડી રહી છે. તેમના જણાવ્યા મુજબ, 1,000 ચોરસ ફૂટના મકાનમાં ઇલેક્ટ્રિક વાયરિંગ પાછળ અગાઉ આશરે રૂ.50,000નો ખર્ચ થતો હતો, જે હવે વધીને લગભગ રૂ.1 લાખ સુધી પહોંચી ગયો છે.

સોલર પેનલથી લઈને ઘરેલુ ઉપકરણો સુધી મોંઘવારી

કોંગ્રેસે માત્ર બાંધકામ સામગ્રી જ નહીં, પરંતુ સોલર પેનલઅને વિવિધ ઘરેલુ ઉપકરણોના ભાવ વધ્યા હોવાનો પણ દાવો કર્યો છે. રમેશના જણાવ્યા અનુસાર, સોલર પેનલની કિંમતોમાં 10થી 15 ટકાનો વધારો થયો છે. આ ઉપરાંત પંખા, ફોલ્સ સીલિંગ અને અન્ય બાંધકામ સંબંધિત ખર્ચમાં પણ વધારો થયો હોવાનો તેમનો દાવો છે.

LED અને હેલોજન લાઇટ પણ મોંઘી હોવાનો દાવો

કોંગ્રેસના જણાવ્યા પ્રમાણે ઇસ્ત્રી જેવા કેટલાક ઘરેલુ ઉપકરણોની કિંમતોમાં 20 ટકા સુધીનો વધારો થયો છે. LED અને હેલોજન લાઇટની કિંમતોમાં પણ આશરે 20 ટકાનો વધારો થયો હોવાનો દાવો કરવામાં આવ્યો છે. સ્વિચ-સોકેટ, મેન લાઇન કેબલ, ટાઇલ્સ, વાયરિંગ અને મજૂરી સહિત મકાન બાંધકામ સાથે સંકળાયેલા વિવિધ ખર્ચમાં વધારો થયો હોવાનો કોંગ્રેસે આક્ષેપ કર્યો છે.

'સરકાર આંકડાઓની રમત રમી રહી છે'

કોંગ્રેસે આરોપ લગાવ્યો છે કે સરકાર મોંઘવારીની વાસ્તવિક સ્થિતિ પરથી લોકોનું ધ્યાન હટાવવા માટે સત્તાવાર આંકડાઓને અલગ રીતે રજૂ કરી રહી છે. જોકે, કોંગ્રેસ દ્વારા કરવામાં આવેલા ભાવવધારાના આ દાવાઓ પક્ષના નિવેદન પર આધારિત છે. આ આંકડાઓ અંગે સરકાર તરફથી શું સ્પષ્ટતા કરવામાં આવે છે તે આગામી સમયમાં મહત્વનું રહેશે. મોંઘવારીના મુદ્દે કોંગ્રેસના આ આક્ષેપો બાદ કેન્દ્ર સરકાર અને વિપક્ષ વચ્ચે રાજકીય ઘમાસાણ વધુ તેજ થવાની શક્યતા છે.