વૈભવ સૂર્યવંશીની તોફાની બેટિંગે SRHને હચમચાવી દીધું

ટોસ હાર્યા બાદ પ્રથમ બેટિંગ કરવા ઉતરેલી રાજસ્થાન રોયલ્સ (Rajasthan Royals)માટે 15 વર્ષીય વૈભવ સૂર્યવંશીએ ફરી એકવાર ધમાકેદાર પ્રદર્શન કર્યું. તેણે માત્ર 29 બોલમાં 97 રનની તોફાની ઇનિંગ રમી, જેમાં 5 ચોગ્ગા અને 12 આકાશી છગ્ગાનો સમાવેશ થયો હતો. વૈભવ માત્ર ત્રણ રનથી IPL ઇતિહાસની સૌથી ઝડપી સદીથી ચૂકી ગયો.

તેની આક્રમક બેટિંગના કારણે રાજસ્થાને શરૂઆતથી જ હૈદરાબાદના બોલરો પર દબાણ બનાવી દીધું. યશસ્વી જયસ્વાલે પણ 29 રનની ઉપયોગી ઇનિંગ રમી જ્યારે ધ્રુવ જુરેલે માત્ર 21 બોલમાં અડધી સદી ફટકારી ટીમને વિશાળ સ્કોર તરફ દોરી.

મધ્યક્રમનો ફિનિશિંગ ટચ

કેપ્ટન રિયાન પરાગે 12 બોલમાં 26 રનની ઝડપી ઇનિંગ રમી જ્યારે અંતિમ ઓવરોમાં ડોનોવન ફેરેરા અને દાસુન શનાકાએ ઝડપી રન ઉમેર્યા. રાજસ્થાને 20 ઓવરમાં 8 વિકેટે 243 રનનો વિશાળ સ્કોર ઉભો કર્યો.

હૈદરાબાદ તરફથી પ્રફુલ હિંગેએ સૌથી વધુ ત્રણ વિકેટ ઝડપી. શિવંગ કુમાર, ઇશાન મલિંગા અને નીતિશ રેડ્ડીને એક-એક સફળતા મળી.

આર્ચર અને બર્ગરની ઘાતક બોલિંગ

244 રનના લક્ષ્‍યાંકનો પીછો કરવા ઉતરેલી સનરાઇઝર્સ હૈદરાબાદની શરૂઆત જ ખરાબ રહી. જોફ્રા આર્ચરે પહેલી જ ઓવરમાં અભિષેક શર્માને ખાતું ખોલાવ્યા વગર પેવેલિયન મોકલી દીધો.

ઈશાન કિશને 33 રનની ઝડપી ઇનિંગ રમી, પરંતુ આર્ચરે તેને પણ આઉટ કરીને રાજસ્થાનને મોટી સફળતા અપાવી. ટ્રેવિસ હેડ, ક્લાસેન અને નીતિશ રેડ્ડી જેવા બેટર્સ ટકી રહ્યા છતાં જરૂરી રનરેટ સતત વધી રહ્યો હતો.

નંદ્રે બર્ગર અને યશ રાજ પુંજાએ મધ્ય ઓવરોમાં મહત્વપૂર્ણ વિકેટો ઝડપી હૈદરાબાદની કમર તોડી નાખી.

ક્લાસેન અને નીતિશની લડત નિષ્ફળ

હેનરિક ક્લાસેન પાસેથી મોટી ઇનિંગની આશા હતી, પરંતુ તે 18 રન બનાવી LBW આઉટ થયો. નીતિશ રેડ્ડીએ 38 રનની લડાયક ઇનિંગ રમી, પરંતુ બીજી તરફથી સતત વિકેટો પડતી રહી.

અંતે હૈદરાબાદની ટીમ 19.2 ઓવરમાં 196 રનમાં ઓલઆઉટ થઈ ગઈ અને ટૂર્નામેન્ટમાંથી બહાર થઈ ગઈ.

વૈભવે તોડ્યો ક્રિસ ગેઇલનો મોટો રેકોર્ડ

વૈભવ સૂર્યવંશી (Vaibhav Suryavanshi)એ આ સિઝનમાં સૌથી વધુ છગ્ગા ફટકારવાનો ક્રિસ ગેઇલનો રેકોર્ડ પણ તોડી નાખ્યો. ગેઇલે IPL 2012માં 59 છગ્ગા ફટકાર્યા હતા, જ્યારે વૈભવે આ સિઝનમાં તે આંકડો પાછળ છોડી દીધો છે.

15 વર્ષની ઉંમરે વૈભવનું આ પ્રદર્શન ક્રિકેટ વિશ્વમાં ચર્ચાનો વિષય બની ગયું છે.

હવે RR vs GTમાં જંગ

રાજસ્થાન રોયલ્સ (Rajasthan Royals)હવે ક્વોલિફાયર-2માં ગુજરાત ટાઇટન્સ સામે ટકરાશે. બંને ટીમો ફાઇનલમાં પહોંચવા માટે પૂરી તાકાત લગાવશે. વૈભવ સૂર્યવંશી (Vaibhav Suryavanshi)નું ફોર્મ અને જોફ્રા આર્ચરની ઘાતક બોલિંગ ગુજરાત માટે મોટી ચિંતા બની શકે છે.

ક્રિકેટ ચાહકો માટે હવે આગામી મુકાબલો વધુ રોમાંચક બનવાનો છે.