Surat Gold Scam: જૂના ગ્રાહક મારફતે થયો પરિચય

ફરિયાદ મુજબ, 35 વર્ષથી કાર્યરત અંબિકા જવેલર્સના (Ambika Jewellers) માલિક નિકુંજ લુંભાણીનો આરોપી પરેશ રણછોડડોબરીયા સાથે પરિચય તેમના એક જૂના ગ્રાહક મારફતે (Gold Scam) થયો હતો. માર્ચ 2026માં થયેલી મુલાકાત દરમિયાન આરોપીએ બજાર ભાવ કરતાં 4 ટકા ઓછા ભાવે સોનું અપાવવાનો દાવો કર્યો હતો. વિશ્વાસ જીતવા માટે તેણે પોતાના પિતાના નામે રૂ.15 લાખની પ્રોમિસરી નોટ પણ આપી હતી.

પ્રથમ સોદાથી જીત્યો વેપારીનો વિશ્વાસ

આરોપીના વિશ્વાસમાં આવીને નિકુંજ લુંભાણીએ RTGS મારફતે રૂ.15 લાખ ટ્રાન્સફર કર્યા હતા. થોડા દિવસો બાદ આરોપીએ 100 ગ્રામનું સોનાનું બિસ્કિટ બતાવી સફળ સોદાનો વિશ્વાસ ઉભો કર્યો હતો. આ પ્રારંભિક વ્યવહાર બાદ વેપારીએ આરોપી પર સંપૂર્ણ વિશ્વાસ મૂકી દીધો હતો.

એક કિલો સોનાની લાલચમાં મોટું રોકાણ

જૂન 2026માં આરોપીએ ફરી સંપર્ક કરીને મુંદ્રા પોર્ટ પરથી એક કિલો સોનું આવવાનું હોવાનું જણાવ્યું. તેણે વધુ નફો અને કમિશનની લાલચ આપીને મોટું રોકાણ (Gold Investment Scam) કરવા પ્રેર્યા. આ ઓફરથી પ્રભાવિત થઈ વેપારીએ પરિવારજનો સાથે ચર્ચા કરીને મોટી રકમની વ્યવસ્થા કરી.

પરિવાર અને ઓળખીતાઓ પાસેથી ભેગા કર્યા લાખો રૂપિયા

નિકુંજભાઈએ પોતાની બચતમાંથી રૂ.69 લાખ રોકડા એકત્ર કર્યા હતા. ઉપરાંત તેમના ઓળખીતાએ રૂ.25 લાખની વ્યવસ્થા કરી આપી હતી. અગાઉ બેંક મારફતે ચૂકવેલા રૂ.15 લાખ સહિત આરોપી પાસે કુલ રૂ.1.09 કરોડની રકમ પહોંચી હતી.

સરખેજથી સાંણદ સુધી રચાયો ઠગાઈનો પ્લાન

6 જુલાઈ 2026ના રોજ વેપારી અમદાવાદના સરખેજ પહોંચ્યા, જ્યાં આંગડિયા મારફતે પહોંચાડાયેલી રોકડ મેળવી કુલ રૂ.94 લાખ એક બેગમાં રાખવામાં આવ્યા. ત્યારબાદ આરોપી પોતાની ઓડી કારમાં તેમને સાંણદ ટોલ પ્લાઝા નજીક લઈ ગયો અને સોનું લઈને આવવાનું કહી રોકડ ભરેલો થેલો લઈને ચાલ્યો ગયો.

વીડિયો કોલ બાદ ફોન બંધ કરી થયો ફરાર

થોડો સમય પસાર થયા બાદ પણ આરોપી પરત ન ફરતાં વેપારીએ વીડિયો કોલ કર્યો હતો. આરોપીએ ટ્રાફિકનું બહાનું બતાવી થોડા સમયમાં પરત આવવાનું કહ્યું હતું, પરંતુ ત્યારબાદ તેનો મોબાઇલ ફોન સ્વિચ ઓફ થઈ ગયો. પરિવારજનોનો સંપર્ક કરતાં પણ કોઈ સંતોષકારક જવાબ મળ્યો ન હતો.

પોલીસમાં ફરિયાદ, તપાસ શરૂ

છેતરપિંડીનો ભોગ બન્યાની ખાતરી થતાં નિકુંજ લુંભાણીએ વરાછા પોલીસ સ્ટેશનમાં ફરિયાદ નોંધાવી હતી. પોલીસે આરોપી પરેશ ડોબરીયા સામે છેતરપિંડીનો ગુનો નોંધી વધુ તપાસ શરૂ કરી છે. સમગ્ર ઘટનાની તપાસ સંબંધિત પોલીસ અધિકારીને સોંપવામાં આવી છે અને આરોપીની શોધખોળ ચાલુ છે.

વેપારીઓ માટે ચેતવણીરૂપ ઘટના

આ ઘટના વેપારીઓ માટે પણ ચેતવણીરૂપ માનવામાં આવી રહી છે. નિષ્ણાતોનું કહેવું છે કે બજાર કરતાં ખૂબ ઓછા ભાવે માલ આપવાના દાવા, મોટી રોકડની લેવડદેવડ અને પૂરતી કાનૂની ચકાસણી વગર થતા સોદાઓમાં સાવચેતી રાખવી જરૂરી છે.