ટંકારા: રક્ષાબંધનના પાવન પર્વ નિમિત્તે યોગ ટીમ ટંકારા દ્વારા આયોજિત 'બંધન ફોર ફૌજી' કાર્યક્રમ અંતર્ગત ટંકારાની માતૃશક્તિએ રાષ્ટ્ર અને સમાજની સેવા સાથે જોડાયેલા વિવિધ વર્ગો પ્રત્યે સન્માન અને કૃતજ્ઞતાની અનોખી અભિવ્યક્તિ કરી હતી.
કાર્યક્રમ દરમિયાન દેશની સુરક્ષા માટે પોતાના જીવનના અમૂલ્ય વર્ષો સમર્પિત કરનાર નિવૃત્ત આર્મી જવાનોને રક્ષાસૂત્ર બાંધી તેમના શૌર્ય, ત્યાગ અને રાષ્ટ્રપ્રત્યેની અવિરત નિષ્ઠાને નમન કરવામાં આવ્યું હતું.
આ સાથે ટંકારા પોલીસ સ્ટેશન ખાતે પહોંચીને પોલીસકર્મીઓને પણ રાખડી બાંધી, કાયદો-વ્યવસ્થા, શાંતિ અને જનસુરક્ષા માટે સતત ફરજ બજાવતા પોલીસ પરિવાર પ્રત્યે આદર વ્યક્ત કરવામાં આવ્યો હતો.
ઉપરાંત, ટંકારાના સામાજિક આગેવાનો, સેવાભાવી અગ્રણીઓ, નગરપાલિકાના હોદ્દેદારો અને ગ્રામજનોને પણ રક્ષાસૂત્ર બાંધી, સમાજના વિકાસ અને લોકહિત માટે તેમના યોગદાનને સન્માનિત કરવામાં આવ્યું હતું. આ કાર્યક્રમનો મુખ્ય હેતુ સમાજ માટે પોતાની રીતે નિષ્ઠાપૂર્વક કાર્ય કરતા દરેક વ્યક્તિ અને વર્ગ પ્રત્યે કૃતજ્ઞતા વ્યક્ત કરવાનો હતો.
આ સમગ્ર આયોજન યોગપ્રચારક Adv.કંચન સારેસા(યોગકોચ, પતંજલિ તાલુકા પ્રભારી), તથા યોગ કોચ ડિમ્પલબેન સારેસા, (યોગકોચ, પતંજલિ તાલુકા મહામંત્રી),ના માર્ગદર્શન હેઠળ યોગ ટીમ ટંકારાની માતૃશક્તિ દ્વારા કરવામાં આવ્યું હતું. યોગ ટીમ ટંકારા યોગના માધ્યમથી સ્વાસ્થ્ય જાગૃતિ ફેલાવવાની સાથે સમાજસેવા, નારી સશક્તિકરણ, સંસ્કાર અને રાષ્ટ્રભાવનાને પણ પોતાની પ્રવૃત્તિઓનો અભિન્ન હિસ્સો બનાવી રહી છે. આ કાર્યક્રમ દ્વારા ટીમે સ્પષ્ટ સંદેશ આપ્યો કે સમાજને મજબૂત બનાવવામાં માત્ર એક વ્યક્તિ નહીં, પરંતુ સૈનિકનું સમર્પણ, પોલીસની ફરજ, આગેવાનોનું માર્ગદર્શન, હોદ્દેદારોની જવાબદારી અને જનસામાન્યનો સહકાર-દરેકનું યોગદાન મહત્વપૂર્ણ છે.
"રક્ષાસૂત્ર માત્ર કાંડા પર બંધાતો દોરો નથી, તે સન્માન, વિશ્વાસ, કૃતજ્ઞતા અને એકબીજાના સાથનું પવિત્ર બંધન છે."
યોગ ટીમ ટંકારાએ ભવિષ્યમાં પણ માતૃશક્તિના સંગઠન અને સામાજિક સહકાર સાથે જનહિતલક્ષી, રાષ્ટ્રપ્રેરક અને સેવાભાવી પ્રવૃત્તિઓ દ્વારા ટંકારાની આગવી ઓળખને વધુ સશક્ત બનાવવાનો સંકલ્પ વ્યક્ત કર્યો હતો.
