ગાંધીનગર વિભાગના નાયબ પોલીસ મહાનિરીક્ષક વિરેન્દ્રસિંહ યાદવ અને ઇન્ચાર્જ પોલીસ અધિક્ષક આયુષ જૈનની સૂચના અનુસાર, LCB-2ના પીઆઇ કે. જે. રાઠોડના માર્ગદર્શન હેઠળ એક વિશેષ યાદી તૈયાર કરવામાં આવી હતી. પીએસઆઈ કે.કે. પાટડિયા, બી.એચ. ઝાલા અને એન.એમ. સિસોદિયાની આગેવાનીમાં પોલીસે ટેકનિકલ સોર્સ અને સ્થાનિક બાતમીદારોની મદદથી આશ્રયસ્થાનો પર કોમ્બિંગ હાથ ધર્યું હતું.

કોમ્બિંગ દરમિયાન કોન્સ્ટેબલ વિપુલકુમારને ચોક્કસ બાતમી મળી હતી કે, કલોલ તાલુકા પોલીસ સ્ટેશનના ગુનાનો આરોપી મંગલારામ વરીગારામ બિશ્નોઇ (મૂળ રહે. જોગાઉ, રાજસ્થાન) હાલ મોરબીની સમરાથલ ભાદુ હોટલ ખાતે છે. તેના આધારે LCB-2ના પી.આઈ. કે.જે. રાઠોડ, પીએસઆઈ બી.એચ. ઝાલા, હેડ કોન્સ્ટેબલ વિપુલકુમાર અને કોન્સ્ટેબલ કરણસિંહ સહિતની ટીમે મોરબી પહોંચી વેશપલ્ટો કરીને આરોપીની ઓળખ સુનિશ્ચિત કરી તેને દરોડો પાડી ઝડપી લીધો હતો.

આજથી ૨૨ વર્ષ પહેલાં કલોલ તાલુકા મથકે આરોપી મંગલારામ અને તેના સગા સંબંધીઓએ મળીને અસલી ચલણી નોટોના બદલામાં નકલી ચલણી નોટો એકના ત્રણ ગણા કરી આપવાની લાલચ આપી છેતરપિંડી આચરી હતી. ગુનો નોંધાયા બાદ આરોપી રાજસ્થાન ભાગી ગયો હતો અને હાલ મોરબી મીયાણા ખાતે પોતાની ઓળખ છુપાવી પરિવાર સાથે રહેતો હતો. હાલમાં પકડાયેલા આરોપીને આગળની તપાસ માટે કલોલ તાલુકા પોલીસ સ્ટેશન સોંપવામાં આવ્યો છે.