કેરળના વાયનાડમાં આવેલા વિનાશક ભૂસ્ખલનમાં મૃત્યુઆંક વધીને ચાર થઈ ગયો છે. કાટમાળ નીચે દટાયેલા ચાર ગુમ થયેલા લોકોને શોધવા માટે અનેક એજન્સીઓ સાથે મળીને એક વિશાળ બચાવ કામગીરી ચાલી રહી છે. આ દરમિયાન ભૂસ્ખલનનો એક ભયાનક વિડીયો સામે આવ્યો છે. જેમાં રોડ પર ઉભેલું એક ટેન્કર રમકડાની જેમ તણાઈને જીપ સાથે ટકરાય છે.

ભૂસ્ખલનના વિડીયોમાં એક ટેન્કર એક બસ અને ઘણા લોકો ઝડપથી વહેતા કાટમાળ અને પાણીના પ્રવાહમાં તણાઈ ગયા છે.

પ્રત્યક્ષદર્શી કહ્યું કે, 'અમે પહેલા એક હળવો અવાજ સાંભળ્યો. અમે બધા તરત જ દુકાનમાંથી બહાર દોડી ગયા. શરૂઆતમાં ટેકરીનો એક નાનો ભાગ સરકતો હોય તેવું લાગતું હતું, પરંતુ તે ઝડપથી મોટા ભૂસ્ખલનમાં ફેરવાઈ ગયું. અમે તરત જ નજીકના લોકોને ભાગી જવા કહ્યું. બસ સ્ટોપ પર ઘણા લોકો ઉભા હતા અને કેટલાક મજૂરો પણ કામ કરી રહ્યા હતા. તે જ સમયે પુલની બીજી બાજુ ઉભેલું એક ટેન્કર ભૂસ્ખલનમાં ફસાઈ ગયું અને અમારી તરફ વહેતું આવ્યું. મને લાગે છે કે 10થી 15 લોકો કાટમાળ નીચે દટાયા હતા. અત્યાર સુધી, ચાર લોકોને બચાવી લેવામાં આવ્યા છે. પુલ પરના લોકો નદીમાં પડ્યા હતા કે કાટમાળ નીચે ફસાયા છે તે સ્પષ્ટ નથી.'

10 ઘાયલ લોકોની બે હોસ્પિટલમાં સારવાર ચાલી રહી છે જ્યારે બચાવકર્તાઓ કાટમાળમાં ફસાયેલા લોકો સુધી પહોંચવા માટે ભારે મહેનત કરી રહ્યા છે. ભારે ભૂસ્ખલનમાં એક ચર્ચ અને નજીકનું ઘર પણ તણાઈ ગયું હોવાના અહેવાલ છે. સદનસીબે ઘરના લોકો બહાર હોવાથી કોઈ જાનહાનિ થઈ નહોતી. અસરગ્રસ્ત વિસ્તારોને જોડતો પુલ કાટમાળ નીચે દટાઈ ગયો હતો, જેના કારણે બચાવ કાર્યમાં ભારે અવરોધ ઉભો થયો હતો.

બચાવ કામગીરી યુદ્ધના ધોરણે ચાલી રહી છે, જેમાં ભારે મશીનરીનો ઉપયોગ કરીને મોટા પ્રમાણમાં કાટમાળ દૂર કરવામાં આવી રહ્યો છે અને ગુમ થયેલા લોકોને શોધવામાં આવી રહ્યા છે. કલ્લાડીમાં મીનાક્ષી પુલ પાસે ભૂસ્ખલન થયું હતું. પ્રારંભિક અહેવાલો દર્શાવે છે કે સતત વરસાદને કારણે સ્થળ પર ખોદકામ કરાયેલ માટીના ઢગલા તૂટી પડ્યા હતા અને એક ભાગ નીચે આવ્યો હતો. મેપ્પડીમાં ભારે વરસાદ બાદ આ ઘટના બની હતી, જ્યાં છેલ્લા 24 કલાકમાં 226 મીમી વરસાદ નોંધાયો હતો.