પીડિતા ગર્ભવતી બનતાં આ મામલો પ્રકાશમાં આવ્યો હતો અને હાઈકોર્ટની મંજૂરી બાદ તેનો ગર્ભપાત કરાવાયો હતો.

રાણીપ વિસ્તારમાં ભાડાના મકાનમાં રહેતી અને લોકોના ઘરોમાં રાત્રે સફાઈ, વાસણ-કચરાનું કામ કરતી માતાનો પિતરાઈ ભાઈ (રહે. જિ. બનાસકાંઠા) દોઢેક વર્ષ પહેલાં તેના ઘરે રહેવા આવ્યો હતો. રાત્રિના સમયે માતા કામે જતી ત્યારે આ મામા પીડિતાના 10 વર્ષના નાના ભાઈને રમવા અથવા બિસ્કિટ લેવા નીચે મોકલી દેતો હતો અને પાછળથી માસૂમ બાળકીને જાનથી મારી નાખવાની ધમકી આપીને તેની સાથે અવારનવાર દુષ્કર્મ ગુજારતો હતો. દર 10-15 દિવસે આચરવામાં આવતા આ શારીરિક શોષણને કારણે બાળકી ગર્ભવતી બની ગઈ હતી. બાળકીનો માસિક ધર્મ બંધ થઈ જતાં ગભરાયેલી માતા તેને સોલા સિવિલ હોસ્પિટલ લઈ ગઈ હતી, જ્યાં તબીબી તપાસમાં બાળકી 21 અઠવાડિયાની ગર્ભવતી હોવાનું બહાર આવતાં માતા સ્તબ્ધ થઈ ગઈ હતી. ઘરે આવીને પૂછપરછ કરતાં માસૂમે રડતાં-રડતાં મામાની હેવાનિયતની વિગતો કહી સંભળાવી હતી.

હાઈકોર્ટની મંજૂરીથી ગર્ભપાત અને DNA ટેસ્ટથી ગુનો સાબિત થયો. ઘટનાની જાણ થતાં જ પીડિતાના માસી-માસા અમદાવાદ દોડી આવ્યા હતા અને રાણીપ પોલીસ સ્ટેશનમાં આરોપી મામા વિરુદ્ધ પોક્સો એક્ટ અને બળાત્કારની કલમો હેઠળ ગુનો નોંધાવ્યો હતો. આ દરમિયાન બાળકી ખૂબ જ નાની વયની હોવાથી ગર્ભપાત માટે ગુજરાત હાઈકોર્ટના દ્વાર ખટખટાવવામાં આવ્યા હતા. હાઈકોર્ટની વિશેષ મંજૂરી બાદ સિવિલ હોસ્પિટલમાં બાળકીનો ગર્ભપાત કરાવાયો હતો અને ગર્ભના નમૂનાને DNA ટેસ્ટ માટે FSLમાં મોકલાયો હતો. FSLના DNA રિપોર્ટમાં સ્પષ્ટ થઈ ગયું હતું કે ગર્ભનો પિતા બીજું કોઈ નહીં પણ આરોપી મામા જ હતો. આ વૈજ્ઞાનિક પુરાવો કેસમાં સૌથી મજબૂત કડી સાબિત થયો હતો. આ કેસમાં સરકારી વકીલ તારાબા ચૂડાસમાએ પૂરતા સાક્ષી તપાસી કોર્ટને જણાવ્યું હતું કે, આ ગંભીર પ્રકારનો ગુનો છે અને આરોપી સામે આખોય કેસ નિઃશંકપણે પુરવાર થાય છે. આ કેસમાં આરોપીને સખતમાં સખત સજા કરવી જોઈએ.

કોર્ટની ગંભીર ટિપ્પણી: બાળકીના વિશ્વાસનું ખૂન કરાયું છે

ચુકાદો આપતી વખતે સ્પેશિયલ જજે નોંધ્યું હતું કે, 'આરોપી કોઈ અજાણ્યો શખ્સ નહોતો, પરંતુ પીડિતાનો સગો મામા હતો. બાળકી જેને આદર આપતી હતી તે વ્યક્તિએ જ પૂર્વનિયોજિત કાવતરું રચીને, તેના નાના ભાઈને ઘરની બહાર મોકલી માસૂમ પર વારંવાર અત્યાચાર ગુજાર્યો છે. 13 વર્ષની કુમળી વયે બાળકીને હોસ્પિટલમાં જઈને ગર્ભપાતની અને મૃત બાળકને જન્મ આપવાની અસહ્ય માનસિક અને શારીરિક યાતનાઓ ભોગવવી પડી છે. આરોપીએ સહેજ પણ પસ્તાવો દર્શાવ્યો નથી. બાળકીના વિશ્વાસનું ખૂન કરાયું છે ત્યારે આવા કિસ્સામાં ન્યાયના હિતમાં આરોપી પ્રત્યે કોઈ પણ નરમ વલણ દાખવી શકાય નહીં.'