રવિવારે (30 ઓગસ્ટ, 2026) તાશકંદમાં ઉઝબેકિસ્તાનના રાષ્ટ્રપતિ શાવકત મિર્ઝિયોયેવે વડાપ્રધાન નરેન્દ્ર મોદીને પોતાના દેશના સર્વોચ્ચ મિત્રતા સન્માન 'ઓલી દરાજાલી દોસ્તલિક'થી સન્માનિત કર્યા. આ અંગે હૈદરાબાદના સાંસદ અસદુદ્દીન ઓવૈસીએ RSSને વિચારવા કહ્યું છે કે જે BJP બાબરના નામે અમને ગાળો આપતી હતી, આશા છે કે હવે એવું નહીં કરે.

હું BJPના લોકોને અભિનંદન આપું છું કે એ દેશે પણ વડાપ્રધાનને પુરસ્કાર આપી દીધો, જ્યાંથી બાબર ભારત આવ્યો હતો. ફરગાના વેલી ઉઝબેકિસ્તાનમાં જ તો છે. – અસદુદ્દીન ઓવૈસી, AIMIM સાંસદ

'બાબરના નામે ગાળો આપતા હતા, એ જ દેશ પુરસ્કાર આપી રહ્યો છે'

વિપક્ષના અન્ય નેતાઓની જેમ PM મોદીને વિદેશમાં મળતા સન્માન પર કટાક્ષ કરતાં ઓવૈસીએ કહ્યું, 'વડાપ્રધાન જ્યાં પણ જાય છે ત્યાંથી પુરસ્કાર લઈને આવે છે. તમને અભિનંદન… બાબરના નામે આટલી ગાળો આપતા હતા… એ જ દેશના લોકો તમને પુરસ્કાર આપી રહ્યા છે. સંઘના લોકોએ આ અંગે વિચારવું પડશે.'

'આશા છે કે સંઘ હવે બાબરનું નામ નહીં લે'

• AIMIM પ્રમુખે કહ્યું, 'અમને તો બાબરના નામે ગાળો આપતા હતા. હવે તમને જ્યાંથી બાબર આવ્યો હતો ત્યાંનું નાગરિક સન્માન આપી દીધું.'
• અસદુદ્દીન ઓવૈસીએ એમ પણ કહ્યું કે, 'અમે આશા રાખીએ છીએ કે હવે RSS અને સંઘ પરિવારના લોકો બાબરનું આ રીતે નામ નહીં લે.'

ઓલી દરાજાલી દોસ્તલિકનો અર્થ શું છે

'ઓલી દરાજાલી દોસ્તલિક' ઉઝબેકિસ્તાનનું સર્વોચ્ચ મિત્રતા સન્માન છે, જે કોઈ મિત્ર દેશના નેતાને આપવામાં આવે છે. ઉઝબેક ભાષામાં ઓલી દરાજાલીનો અર્થ સર્વોચ્ચ સ્તર અને દોસ્તલિકનો અર્થ મિત્રતા થાય છે. એટલે કે 'સર્વોચ્ચ મિત્રતાનું સન્માન'.

PM મોદીને 35થી વધુ દેશો આપી ચૂક્યા છે સન્માન

PM મોદીએ ઉઝબેકિસ્તાન તરફથી મળેલા આ સન્માન અંગે પોતાના સોશિયલ મીડિયા પોસ્ટમાં લખ્યું, 'ઓલી દરાજાલી દોસ્તલિક સન્માન' મેળવીને હું સન્માનિત અનુભવું છું. હું આ સન્માન ભારત અને ઉઝબેકિસ્તાન વચ્ચેના અતૂટ સંબંધને સમર્પિત કરું છું.' PM મોદીને અત્યાર સુધી 35થી વધુ દેશો પોતાના સર્વોચ્ચ નાગરિક સન્માનથી સન્માનિત કરી ચૂક્યા છે.

ફરગાના વેલી ક્યાં આવેલી છે

• મધ્ય એશિયાની ફરગાના વેલી તિયાન શાન, ગિસ્સાર અને અલાય પર્વતમાળાઓની વચ્ચે આવેલી વિશાળ ખીણ છે.
• ફરગાના વેલીનો મોટાભાગનો વિસ્તાર ઉઝબેકિસ્તાનમાં આવેલો છે, પરંતુ તે તાજિકિસ્તાન અને કિર્ગિસ્તાન સુધી પણ વિસ્તરેલો છે.

બાબર ક્યાંનો રહેવાસી હતો

• મુઘલ આક્રમણકારી બાબર ઉઝબેકિસ્તાનની ફરગાના ખીણનો રહેવાસી હતો, જેણે ભારતમાં અનેક મંદિરો પર હુમલા કર્યા હતા, જેમાં અયોધ્યાની પવિત્ર રામજન્મભૂમિ પણ સામેલ હતી. તેણે જ ભારતમાં મુઘલ સલ્તનતની સ્થાપના કરી હતી, જેમાં આગળ જતાં અકબર, શાહજહાં અને ઔરંગઝેબ જેવા શાસકો થયા.
• જોકે, ફરગાના વેલીમાં અલગ-અલગ સમયગાળામાં ઈરાની, આરબ, તુર્ક, ગ્રીક અને મંગોલ આક્રમણકારોએ પણ પોતાનો વસવાટ કર્યો હતો.
• લાંબા સમય સુધી અહીં સીથિયન નામના યોદ્ધાઓનો પણ કબજો રહ્યો હતો, જેઓ તીરંદાજી અને યુદ્ધકળામાં નિપુણ હતા.