Pancreatic Cancer Drug: પેનક્રિએટિક કેન્સર એટલે અગ્નાશયના કેન્સરને દુનિયાના સૌથી જીવલેણ કેન્સર માનવામાં આવે છે, કારણ કે તે શરૂઆતના સ્ટેજમાં પકડમાં જ આવતું નથી. જોકે, હવે દર્દીઓ માટે એક મોટા રાહતના સમાચાર સામે આવ્યા છે. અમેરિકાની ફૂડ એન્ડ ડ્રગ એડમિનિસ્ટ્રેશને એડવાન્સ્ડ પેનક્રિએટિક કેન્સર માટે એક ક્રાંતિકારી નવી દવાને મંજૂરી આપી છે, જેને દાયકાઓથી ડૉક્ટર અને વૈજ્ઞાનિકો શોધી રહ્યા હતા.
ચાલો જાણીએ આ દવા શું છે, કેવી રીતે કામ કરે છે અને દર્દીઓ માટે તે કેટલી અસરકારક સાબિત થઈ છે.
કઈ દવાને મળી મંજૂરી?
ફૂડ એન્ડ ડ્રગ એડમિનિસ્ટ્રેશને 'ડારાક્સોનરાસિબ' વેક્સિનને મંજૂરી આપી છે, જેને રેવોલ્યુશન મેડિસિન્સ કંપની રાસોન્ક બ્રાન્ડ નામથી વેચશે. આ પોતાની જાતની પ્રથમ ગોળી છે, જે એક મ્યુટેટેડ પ્રોટીનને બ્લોક કરે છે. આ 90 ટકાથી વધુ પેનક્રિએટિક કેન્સરના કેસોમાં ટ્યુમરની ગ્રોથ વધારી દે છે. ફૂડ એન્ડ ડ્રગ એડમિનિસ્ટ્રેશને તેને નક્કી સમય કરતાં છ મહિના પહેલાં જ એક્સપેડાઇટેડ અપ્રૂવલ આપી દીધું, જે આ દવાનું મહત્વ દર્શાવે છે.
શું ટાર્ગેટ કરે છે આ દવા?
આ નવી દવા આરએએસજિન ફેમિલીમાં થતા મ્યુટેશનને નિશાન બનાવે છે, જે સેલ ગ્રોથને નિયંત્રિત કરે છે. તેમાં KRAS મ્યુટેશનને પેનક્રિએટિક કેન્સર વધવાનું સૌથી મોટું કારણ માનવામાં આવે છે. પરંતુ આ પ્રોટીનની રચના એવી છે કે તેની સાથે જોડાઈ શકે તેવી કોઈ દવા બનાવવી ઘણા દાયકાઓ સુધી અશક્ય માનવામાં આવતી હતી, આ જ કારણ છે કે તેને અનડ્રગેબલ કહેવામાં આવતું હતું. રેવોલ્યુશન મેડિસિન્સની આ દવા એક પ્રકારના મોલેક્યુલર ગ્લૂ દ્વારા અનેક KRAS સબટાઇપ્સ સાથે જોડાવામાં સફળ રહે છે.
દર્દીઓ માટે કેમ છે ફાયદાકારક?
આ સ્ટડીમાં 500 દર્દીઓ સામેલ હતા, જેમનો મેટાસ્ટેટિક એટલે કે ફેલાઈ ચૂકેલો કેન્સર અગાઉની સારવાર પર રિસ્પોન્સ આપવાનું બંધ કરી ચૂક્યો હતો. દર્દીઓને રેન્ડમલી આ નવી દવા અથવા જૂની કીમોથેરાપી ટ્રીટમેન્ટ પર રાખવામાં આવ્યા હતા. પરિણામોમાં જાણવા મળ્યું કે નવી દવા લેનારા દર્દીઓના જીવિત રહેવાની શક્યતા લગભગ બમણી થઈ શકે છે. સાથે જ તેમનામાં ખતરનાક સાઇડ ઇફેક્ટ્સ પણ ઓછા જોવા મળી શકે છે.
કેટલી છે દવાની કિંમત
કંપની અનુસાર, આ દવાના એક મહિનાના કોર્સની કિંમત લગભગ 39,800 ડૉલર છે, એટલે કે ભારતીય રૂપિયામાં આશરે 33 લાખ રૂપિયા થાય છે. તે દરરોજ લેવામાં આવતી ગોળીના સ્વરૂપમાં આવશે. પેનક્રિએટિક કેન્સરની સારવાર કરતા ડૉક્ટરોને આશા છે કે આ દવાની મંજૂરી અન્ય કેન્સર માટે પણ નવા રસ્તા ખોલી શકે છે, કારણ કે આ જ આધાર પર ડઝનેક એક્સપેરિમેન્ટલ દવાઓ પણ ડેવલપમેન્ટ સ્ટેજમાં છે. કંપની હવે આ જ ટેક્નોલોજીને ફેફસાના કેન્સર સાથે અન્ય અનેક પ્રકારના કેન્સર પર પણ ટેસ્ટ કરી રહી છે.
અમેરિકન કેન્સર સોસાયટી અનુસાર માત્ર અમેરિકામાં આ વર્ષે આશરે 67,000 નવા પેનક્રિએટિક કેન્સરના કેસ સામે આવ્યા છે, જ્યારે 52,000થી વધુ લોકોના તેનાથી મૃત્યુનું જોખમ હોય છે. આ બીમારીમાં પાંચ વર્ષ સુધી જીવિત રહેવાનો દર માત્ર 13 ટકા છે, જે તેને સૌથી જીવલેણ કેન્સરમાંથી એક બનાવે છે.