Mumbai Fake Stamp Paper Scam। મુંબઈ પોલીસની ક્રાઈમ બ્રાન્ચે એક સરાહનીય ઓપરેશન પાર પાડીને નકલી સ્ટેમ્પ પેપર વેચતા અને તેના આધારે કરોડો રૂપિયાની લોન અપાવવાના બહાને લોકો સાથે છેતરપિંડી કરતા એક મોટા રેકેટનો પર્દાફાશ કર્યો છે. ક્રાઈમ બ્રાન્ચે આરોપીઓ પાસેથી આશરે ₹૬૨.૩૮ લાખની કિંમતના નકલી સ્ટેમ્પ પેપર જપ્ત કર્યા છે, જેના કારણે મુંબઈના વ્યાપારી વર્ગમાં ભારે ચકચાર મચી ગઈ છે.

મુંબઈ એરપોર્ટ નજીકથી ઝડપાયો શંકાસ્પદ શખ્સ

ક્રાઇમ બ્રાન્ચ યુનિટ-૮ ના અધિકારીઓને બાતમીદારો પાસેથી ચોક્કસ માહિતી મળી હતી કે, એક વ્યક્તિ મુંબઈ એરપોર્ટ નજીક મોટી માત્રામાં નકલી સ્ટેમ્પ પેપર વેચવા માટે આવવાનો છે. આ માહિતીના આધારે પોલીસે એરપોર્ટ પરિસરમાં વ્યૂહાત્મક રીતે વોચ ગોઠવી હતી. નિર્ધારિત સમયે ત્યાં પહોંચેલા એક શંકાસ્પદ વ્યક્તિને પોલીસે અટકાવીને તેની ઝડતી લેતા તેની પાસેથી ભારે માત્રામાં નકલી સ્ટેમ્પ પેપર મળી આવ્યા હતા. પોલીસ કસ્ટડીમાં લેવાયેલા આ આરોપીની કડક પૂછપરછ દરમિયાન ખુલાસો થયો હતો કે આ નકલી સ્ટેમ્પ પેપર તેને નવી મુંબઈના કોપરખૈરાણે વિસ્તારમાંથી સપ્લાય કરવામાં આવ્યા હતા. આ મહત્વની કડી મળતા જ ક્રાઈમ બ્રાન્ચે તાત્કાલિક દરોડો પાડીને ત્યાંથી બીજા સહ-આરોપીની પણ ધરપકડ કરી લીધી હતી. પ્રાથમિક તપાસમાં પોલીસને આશંકા છે કે પકડાયેલો આ બીજો શખ્સ જ સમગ્ર કૌભાંડનો માસ્ટરમાઇન્ડ (મુખ્ય સૂત્રધાર) છે.

વ્યવસાય માટે મોટી લોન મેળવવા ઈચ્છતા લોકોને બનાવતા ટાર્ગેટ

પોલીસે એસ્પલેનેડ કોર્ટને જણાવ્યું કે, આ ગેંગ એવા લોકોને ટાર્ગેટ કરતી હતી જેમને વ્યવસાય કે અન્ય કામો માટે કરોડો રૂપિયાની મોટી લોનની જરૂર હોય. આરોપીઓ લોન ધારકોને વિશ્વાસમાં લઈને સ્ટેમ્પ પેપરના નામે મોટી રકમ વસૂલતા હતા. જપ્ત કરાયેલા દરેક નકલી સ્ટેમ્પ પેપર પર ૨૫,૦૦૦ ની કિંમત પ્રિન્ટ થયેલી છે. આ નકલી સ્ટેમ્પ પેપર પર તેઓ લોન અરજદારોના એફિડેવિટ (સોગંદનામા) તૈયાર કરતા હતા અને પ્રોસેસિંગ ફીના નામે લાખો રૂપિયા એડવાન્સ પડાવી લેતા હતા.

ઠગાઈની આખી મોડસ ઓપરેન્ડી સમજાવતા પોલીસે જણાવ્યું કે, નકલી સ્ટેમ્પ પર કાગળો તૈયાર કર્યા બાદ આરોપીઓ પીડિતોને લોન પ્રોસેસિંગના બહાને દિલ્હી લઈ જતા હતા. મુસાફરી દરમિયાન આરોપીઓ ચાલાકીથી અસલી દસ્તાવેજો અને કાગળો ભરેલી બેગ ગાયબ કરી દેતા હતા અને બાદમાં પીડિતોને એવું જૂઠું આશ્વાસન આપતા હતા કે બેગ ચોરી થઈ ગઈ હોવાને કારણે હવે લોનની પ્રક્રિયા આગળ વધી શકે તેમ નથી. આ રીતે તેઓ ફાઈલ ચાર્જ અને સ્ટેમ્પના નામે લાખો રૂપિયા પડાવીને પલાયન થઈ જતા હતા. ક્રાઈમ બ્રાન્ચ હવે એ દિશામાં તપાસ કરી રહી છે કે આ નકલી સ્ટેમ્પ પેપરો ક્યાં છાપવામાં આવતા હતા, આ કૌભાંડમાં સરકારી વિભાગના કોઈ વ્યક્તિ સામેલ છે કે કેમ અને અત્યાર સુધીમાં આ ટોળકીએ કેટલા લોકોને કરોડો રૂપિયાનો ચૂનો લગાવ્યો છે.