Stray Dog મહારાષ્ટ્રમાં રખડતા શ્વાનના હુમલાની વધતી જતી ઘટનાઓને પગલે રાજ્ય સરકાર આજે એક્શન મોડમાં જોવા મળી હતી. વિધાનસભામાં પશુ નિયંત્રણના પગલાં કડક બનાવવા અને આ કામગીરીમાં અવરોધ ઊભો કરનારાઓ સામે કડક કાર્યવાહીની માંગણી કરવામાં આવી હતી. રાજ્યભરમાં રખડતા શ્વાનની સંખ્યા ચિંતાજનક સ્તરે પહોંચી છે, જેના નિવારણ માટે સરકાર સતત પ્રયત્નશીલ છે.
Stray Dog - રાજ્યમાં ૧૪.૮ લાખ શ્વાનનો આંકડો, નસબંધી પર ભાર
રાજ્યના પ્રધાન ઉદય સામંતે વિધાનસભામાં મહત્વની માહિતી આપતા જણાવ્યું હતું કે મહારાષ્ટ્રમાં રખડતા શ્વાનની કુલ સંખ્યા આશરે ૧૪.૮ લાખ જેટલી છે, જેમાં માત્ર મુંબઈમાં જ ૯૪ હજાર જેટલા શ્વાન હોવાનો અંદાજ છે. વધતા જતા જોખમને ધ્યાનમાં રાખીને સરકારે નસબંધી (Sterilization) અને રસીકરણ (Vaccination) અભિયાનને ગતિ આપી છે. અત્યાર સુધીમાં રાજ્યમાં ૨ લાખથી વધુ શ્વાનને રસી આપવામાં આવી છે અને ૧.૮ લાખ શ્વાનની નસબંધી કરવામાં આવી છે.
Stray Dog - મુંબઈમાં આગામી છ મહિનામાં ત્રણ નવા શ્વાન આશ્રયસ્થાન
પ્રધાને ગૃહને માહિતી આપી હતી કે રખડતા શ્વાનના વ્યવસ્થાપન માટે આગામી છ મહિનામાં મુંબઈમાં ત્રણ ખાસ ડોગ શેલ્ટર (Dog Shelters) શરૂ કરવામાં આવશે. આ ઉપરાંત, સમગ્ર રાજ્યમાં પશુ જન્મ નિયંત્રણ કેન્દ્રો (Animal Birth Control Centers) સ્થાપવાની યોજના પણ સરકારે તૈયાર કરી છે. તમામ સ્થાનિક સ્વરાજ્ય સંસ્થાઓને સુપ્રીમ કોર્ટના નિર્દેશોનું ચુસ્તપણે પાલન કરવા આદેશ આપવામાં આવ્યો છે, જેથી નાગરિકોની સુરક્ષા સુનિશ્ચિત કરી શકાય.
સરકારી નિવેદન છતાં ગૃહમાં રહેલા અનેક વિધાનસભ્યો સરકારના પ્રતિભાવથી અસંતુષ્ટ જોવા મળ્યા હતા. શ્વાનના હુમલામાં માસૂમ બાળકોના મોતની દુખદ ઘટનાઓને ટાંકીને વિપક્ષ અને સભ્યોએ મજબૂત અને સમયબદ્ધ કાર્યવાહી માટે દબાણ કર્યું હતું. પ્રધાને સ્પષ્ટતા કરી હતી કે આ કામગીરીમાં અડચણ ઊભી કરનારાઓ સામે પણ કાયદેસરની કાર્યવાહી કરવામાં આવશે, જેથી રાજ્યના નાગરિકોને આ ભયમાંથી મુક્તિ મળી શકે.