Sugar Free Sharbat Recipes। મે મહિનાની આ ભીષણ ગરમીમાં માત્ર પાણી અને ઠંડા પીણા જ શરીરને રાહત આપે છે. ઉનાળાની ઋતુમાં લોકો પોતાના ડાયટમાં અલગઅલગ પ્રકારના જ્યુસ અને શરબતનો સમાવેશ કરતા હોય છે. પરંતુ બજારમાં મળતા મોટાભાગના ડ્રિંક્સ અને ઘરમાં બનતા શરબતોમાં ખાંડ (સુગર) નો ખૂબ જ વધારે પડતો ઉપયોગ કરવામાં આવે છે.

આ હાઈકેલરી અને મીઠા પીણાં શરીરને ફાયદો કરાવવાના બદલે નુકસાન વધુ પહોંચાડે છે. જો તમે પણ આ ઉનાળામાં ડાયાબિટીસ કે વજન વધવાના ડર વિના શરીરને ઠંડક આપવા માંગો છો, તો અહીં કેટલાક સુગરફ્રી શરબત અને કૂલર ડ્રિંક્સની રેસિપી આપવામાં આવી છે જે તમને ફ્રેશ રાખશે.

લીંબુ-ફુદીના શિકંજી અને પુદીના છાશ મિનિટોમાં શરીરને આપશે અદભુત ઠંડક

ઉનાળાના દિવસોમાં બહારથી ઘરે આવ્યા બાદ અથવા બપોરના સમયે લીંબુ-ફુદીના શિકંજી એક શ્રેષ્ઠ વિકલ્પ છે. ફુદીનો શરીરને આંતરિક રીતે ઠંડો રાખે છે જ્યારે લીંબુ ત્વરિત તાજગી આપે છે. તેને બનાવવા માટે ઠંડા પાણીમાં લીંબુનો રસ, ક્રશ કરેલા ફુદીનાના તાજા પાન અને સંચળ (કાળું મીઠું) ઉમેરીને પીવો. આ સિવાય ઉનાળામાં દહીંનું સેવન અમૃત સમાન ગણાય છે. દહીંમાં ઠંડું પાણી ઉમેરીને તેને પાતળું કરી છાશ બનાવી લો. હવે તેમાં ફુદીનો, સંચળ અને શેકેલું જીરું ઉમેરીને 'ફુદીના છાશ' તૈયાર કરો. તે સ્વાદિષ્ટ હોવાની સાથે પેટની ગરમીને પણ શાંત કરે છે.

નેચરલ સુગરથી ભરપૂર વોટરમેલન મોહિતો અને ટેસ્ટી નાળિયેર લસ્સી

તરબૂચમાં પુષ્કળ પ્રમાણમાં પાણી હોય છે જે ઉનાળામાં શરીરને હાઈડ્રેટ રાખવા માટે ઉત્તમ ફળ માનવામાં આવે છે. તમે ખાંડ વગર 'વોટરમેલન મિન્ટ મોહિતો' (Watermelon Mint Mojito) બનાવી શકો છો. આ માટે તરબૂચના ટુકડા કરી તેના બીજ કાઢી લો અને તેને મિક્સર ગ્રીન્ડરમાં પીસી લો. હવે તેમાં ફુદીનાના પાનનો રસ અથવા ફુદીનો વાટીને ઉમેરો. ત્યારબાદ થોડો લીંબુનો રસ, સોડા વોટર અને બરફના ટુકડા (Ice Cubes) ઉમેરીને સર્વ કરો. તરબૂચમાં પોતાની કુદરતી મિઠાશ હોવાથી તેમાં ખાંડ ઉમેરવાની બિલકુલ જરૂર પડતી નથી. વળી, જેમને ઘટ્ટ લસ્સી ગમે છે તેઓ દહીં, સૂકા નાળિયેરનું છીણ અને એલચી પાવડર ઉમેરીને 'કોકોનટ લસ્સી' બનાવી શકે છે. સ્વાદ માટે તેમાં પિસ્તા અને ઉપરથી રુહઅફઝા સિરપ પણ ઉમેરી શકાય છે.