West Bengal Election Results। પશ્ચિમ બંગાળ વિધાનસભા ચૂંટણીના પરિણામોના વલણોમાં ભારતીય જનતા પાર્ટી (BJP) એ જોરદાર લીડ મેળવી છે. સવારે 1045 વાગ્યા સુધીના આંકડા મુજબ, ભાજપ 100 થી વધુ બેઠકો પર આગળ વધી રહ્યું છે, જ્યારે સત્તાધારી તૃણમૂલ કોંગ્રેસ (TMC) ઘણી પાછળ જોવા મળી રહી છે. આ સ્થિતિ વચ્ચે ભાજપના દિગ્ગજ નેતા દિલીપ ઘોષે એક ગંભીર આશંકા વ્યક્ત કરી છે કે હાર ભાળી ગયેલી ટીએમસી પરિણામોને સ્વીકારવાનો ઈનકાર કરી શકે છે અને હોબાળો મચાવી શકે છે.
દિલીપ ઘોષનો દાવો: 'બંગાળ હવે ભારત સાથે આગળ વધશે'
ખડગપુર સદર બેઠકથી ભાજપના ઉમેદવાર દિલીપ ઘોષે જણાવ્યું હતું કે બંગાળમાં કાયદો અને વ્યવસ્થા જેવી કોઈ વસ્તુ જ નહોતી. તેમણે ટીએમસી પર નિશાન સાધતા કહ્યું કે, જનતાએ જે વિશ્વાસ સાથે ભાજપને મત આપ્યા છે, તેના પર અમે ખરા ઉતરીશું. બંગાળ હવે ભારત સાથે આગળ વધશે, બાંગ્લાદેશ સાથે નહીં. તેમણે આશંકા વ્યક્ત કરી છે કે ટીએમસી પરિણામોમાં ગરબડના આરોપ લગાવી શકે છે, પરંતુ ચૂંટણી પંચે તેના માટે સંપૂર્ણ તૈયારી કરી રાખી છે.
ચૂંટણી પંચની સજ્જતાથી હિંસા પર અંકુશ
દિલીપ ઘોષે આ વખતે ચૂંટણી શાંતિપૂર્ણ રીતે પૂર્ણ કરવા બદલ ચૂંટણી પંચના વખાણ કર્યા છે. તેમણે કહ્યું કે, 2021 ની સરખામણીએ આ વખતે સુરક્ષા દળોની મોટી તૈનાતીને કારણે હિંસા અને હત્યાઓ રોકી શકાઈ છે. અગાઉના વર્ષોમાં મહિલાઓને ઘરની બહાર નીકળવા દેવામાં આવતી નહોતી, પરંતુ આ વખતે 15 વર્ષ બાદ મહિલાઓને મુક્તપણે મતદાન કરવાની તક મળી છે, જેનું પરિણામ વલણોમાં દેખાઈ રહ્યું છે.
ચૂંટણી પંચની સત્તાવાર વેબસાઈટ મુજબ ભાજપ 83 થી વધુ બેઠકો પર સ્પષ્ટ લીડ જાળવી રહ્યું છે, જ્યારે ટીએમસી 56 બેઠકો પર આગળ છે. ખાનગી ન્યૂઝ ચેનલોના વલણોમાં ભાજપ 149 સુધી પહોંચી ગયું છે. દિલીપ ઘોષે વિશ્વાસ વ્યક્ત કર્યો છે કે પરિણામ હવે માત્ર ઔપચારિકતા છે અને ભાજપ પૂર્ણ બહુમતી સાથે સરકાર બનાવશે. નવી સરકાર શપથ ગ્રહણ કરશે ત્યારે પણ કાયદો અને વ્યવસ્થા જાળવી રાખવા માટે પંચની કડક નજર રહેશે.