બુધવારે મધ્ય નેપાળના રાસુવા અને અન્ય વિસ્તારોમાં આવેલા ભારે પૂર બાદ આ ચેતવણી જારી કરવામાં આવી છે. બુધવારના પૂરમાં સેંકડો લોકો મૃત્યુ પામ્યા હતા અને વસાહતો, રસ્તાઓ, પુલો અને હાઇડ્રોઇલેક્ટ્રિક ઇન્ફ્રાસ્ટ્રક્ચરને મોટા પ્રમાણમાં નુકસાન થયું હતું.

શુક્રવારે અચાનક આવેલા પૂરમાં મૃત્યુઆંક વધીને 547 થયો હતો. દુર્ઘટના બાદ ત્રીજા દિવસે પણ શોધ અને બચાવ કામગીરી ચાલુ છે, જ્યારે હિમાલયના દેશમાં હજુ પણ લગભગ 1500 લોકો ગુમ છે. NDRRMAએ તેની તાજેતરની સૂચનામાં જણાવ્યું હતું કે, “બુધવારે જ્યાં અચાનક પૂર આવ્યું હતું તે જ જગ્યાએ કાદવવાળું પાણીનું સ્તર વધવાને કારણે આ વિસ્તારમાં પૂરનું જોખમ ફરી એકવાર વધી ગયું છે.” NDRRMA એ શોધ અને બચાવ કામગીરીમાં સામેલ લોકો તેમજ ભોટેકોશી અને ત્રિશુલી વિસ્તારમાં રહેતા લોકોને વિવિધ કારણોસર અત્યંત સતર્ક રહેવા અને જો તેઓને કોઈ ખતરો લાગે તો તરત જ સુરક્ષિત સ્થાનો પર ખસી જવાની અપીલ કરી છે.

નેપાળ પોલીસે તિબેટ બાજુનો બંધ ફરીથી તૂટ્યો હોવાની માહિતી મળ્યા બાદ એલર્ટ જાહેર કર્યું છે. “એવું નોંધાયું છે કે તિબેટ બાજુ પર પાણીનો બંધ ફરીથી તૂટી ગયો છે,” નેપાળ પોલીસે X પર એક પોસ્ટમાં જણાવ્યું હતું. એક નિવેદનમાં, નેપાળ પોલીસે જણાવ્યું હતું કે આઠ જિલ્લામાંથી વધુ મૃતદેહો મળી આવ્યા છે. પાડોશી તિબેટમાં ત્રણ લોકોના મોત થયા છે. પોલીસના જણાવ્યા અનુસાર, ચિતવનમાંથી 178, નવલપારાસી પૂર્વમાંથી 110, ગોરખામાંથી 44, નુવાકોટમાંથી 37 અને ધાડિંગ જિલ્લામાંથી 33 મૃતદેહ મળી આવ્યા છે.

તેવી જ રીતે તનાહુમાંથી 28, નવલપારાસી પશ્ચિમમાંથી 27 અને રસુવામાંથી 12 મૃતદેહ મળી આવ્યા હતા. બુધવારે સવારે નેપાળના રાસુવા અને આસપાસના જિલ્લાઓમાં અચાનક પૂરના કારણે ઓછામાં ઓછા 977 લોકો ગુમ થયા છે. જેમાં 86 સુરક્ષાકર્મીઓ, 517 વિદેશી પ્રવાસીઓ અને 127 નેપાળી પ્રવાસીઓનો સમાવેશ થાય છે. અત્યાર સુધીમાં અસરગ્રસ્ત વિસ્તારોમાંથી 1,545 ઘાયલ વ્યક્તિઓ અને ફસાયેલા લોકોને બચાવી લેવામાં આવ્યા છે. તેમાંથી 84 લોકોની કાઠમંડુની અલગ-અલગ હોસ્પિટલમાં સારવાર ચાલી રહી છે, જ્યાં પરિવારના સભ્યો તેમના પ્રિયજનોને શોધી રહ્યાં છે.