કર્મચારીએ બહાદુરીપૂર્વક કર્યો પ્રતિકાર

લૂંટારૂઓના હુમલા છતાં ગેસ એજન્સીના કર્મચારીએ હિંમત હાર્યા વગર પૈસાનો થેલો મજબૂત રીતે પકડી રાખ્યો અને જોરદાર પ્રતિકાર કર્યો હતો. હુમલાખોરોએ તેમને માર મારતા કર્મચારી ગંભીર રીતે ઇજાગ્રસ્ત થયા અને લોહીલુહાણ થઈ ગયા હતા. ઝપાઝપી દરમિયાન કર્મચારીએ બુમાબુમ કરતાં આસપાસના લોકોનું ધ્યાન ઘટનાસ્થળ તરફ ગયું અને સ્થાનિક લોકો મદદ માટે દોડી આવ્યા હતા.

રોકડ છોડીને સોનાનો દોરો લૂંટી ભાગ્યા

આસપાસ લોકો એકત્ર થવા લાગતા આરોપીઓને પકડાઈ જવાનો ભય સતાવ્યો હતો. જેના કારણે તેઓ કર્મચારી પાસેથી રોકડ ભરેલો થેલો લૂંટી શક્યા નહોતા. ભાગતા પહેલાં ચારેય શખસોએ કર્મચારીના ગળામાંથી સોનાનો દોરો ખેંચી લીધો અને બાઈક તથા એક્ટિવા પર ફરાર થઈ ગયા હતા. સમગ્ર ઘટના ખૂબ જ ઝડપથી બનતા સ્થાનિકોમાં પણ ભયનો માહોલ સર્જાયો હતો.

ઘાયલ કર્મચારી એલજી હોસ્પિટલમાં સારવાર હેઠળ

હુમલામાં ગંભીર રીતે ઘાયલ થયેલા ગેસ એજન્સીના કર્મચારીને તાત્કાલિક સારવાર માટે એલજી હોસ્પિટલમાં ખસેડવામાં આવ્યા હતા. ત્યાં તેમની સારવાર ચાલી રહી છે. ઘટનાની જાણ થતાં વિવેકાનંદ નગર પોલીસની ટીમ હોસ્પિટલ પહોંચી હતી અને ઇજાગ્રસ્ત કર્મચારીનું નિવેદન નોંધવાની તેમજ ફરિયાદ દાખલ કરવાની કાર્યવાહી હાથ ધરી હતી.

પોલીસે આરોપીઓની શોધખોળ શરૂ કરી

પ્રાથમિક તપાસના આધારે પોલીસે ઘટનાસ્થળ અને આસપાસના વિસ્તારોના સીસીટીવી ફૂટેજ મેળવવાની કાર્યવાહી શરૂ કરી છે. ઉપરાંત અલગ-અલગ પોલીસ ટીમોને આરોપીઓની શોધખોળ માટે દોડતી કરવામાં આવી છે. પોલીસનું માનવું છે કે આરોપીઓએ અગાઉથી કર્મચારીની હિલચાલ પર નજર રાખી હોવાની સંભાવના છે. હાલ પોલીસે લૂંટ, હુમલો અને અન્ય સંબંધિત કલમો હેઠળ ગુનો નોંધવાની પ્રક્રિયા શરૂ કરી છે અને ફરાર આરોપીઓને ઝડપી પાડવા માટે તપાસ તેજ કરવામાં આવી છે.