Hong Kong Mother Jailed : હૉંગકોંગની એક કોર્ટે પોતાના પાંચ વર્ષના પુત્રને લાંબા સમય સુધી ભૂખ્યો રાખી મોતને ઘાટ ઉતારવાના કેસમાં 37 વર્ષીય મહિલાને 22 વર્ષની જેલની સજા ફટકારી છે. કોર્ટે આ કેસને બાળકો સાથેની ક્રૂરતાના સૌથી ગંભીર કેસોમાંનો એક ગણાવ્યો હતો. ન્યાયાધીશે કહ્યું કે મહિલાના વર્તનમાં માતૃત્વ જેવી કોઈ લાગણી દેખાતી નથી.
ભૂખથી બાળકનું મોત, વજન માત્ર 9.7 કિલો રહ્યું
Hong Kong Mother Jailed કેસમાં રજૂ થયેલા પોસ્ટમોર્ટમ રિપોર્ટ અનુસાર બાળકના મોત સમયે તેનું વજન માત્ર 9.7 કિલોગ્રામ હતું, જ્યારે તેની ઉંમરના બાળકનું સામાન્ય વજન તેનાથી લગભગ બમણું હોવું જોઈએ. બાળકના શરીર પર 129 ઈજાના નિશાન પણ મળી આવ્યા હતા.
તપાસમાં સામે આવ્યું કે બાળકને લાંબા સમય સુધી મારપીટ કરવામાં આવતી હતી, તેને જબરદસ્તી ખવડાવવાનો પ્રયાસ કરાતો હતો અને તેના પર સતત શારીરિક અત્યાચાર કરવામાં આવતા હતા.
ઘણા દિવસોથી ખાવાનું જ મળ્યું નહોતું
ડૉક્ટરોને પોસ્ટમોર્ટમ દરમિયાન બાળકના પેટમાં ખોરાકનો કોઈ અંશ મળ્યો નહોતો. તેનાથી સ્પષ્ટ થયું કે મૃત્યુ પહેલાં તેને ઘણા દિવસો સુધી ખાવાનું આપવામાં આવ્યું નહોતું.
તપાસમાં એ પણ સામે આવ્યું કે મહિલા પોતાના પુત્રને ઘરના એક રૂમમાં અલગ રાખતી હતી અને અઠવાડિયામાં માત્ર થોડા જ વખત બહાર આવવા દેતી હતી. બાળક લાંબા સમય સુધી સ્કૂલે ન જતાં તેણે શિક્ષકોને પણ ખોટી માહિતી આપી હતી.
‘આથી વધુ ભયાનક કેસ વિચારવો પણ મુશ્કેલ’
હાઇકોર્ટના ન્યાયાધીશ સુઝાના ડી’અલ્મેડા રેમેડિયોસે ચુકાદો આપતાં કહ્યું કે પોતાના કારકિર્દીમાં તેમણે આથી વધુ પીડાદાયક અને ભયાનક કેસ ભાગ્યે જ જોયો હશે. બાળકને જાણબૂઝીને ભૂખ્યો રાખીને મોતને ધકેલવામાં આવ્યો હતો, જે માનવતા અને માતૃત્વ બંને વિરુદ્ધનું કૃત્ય છે.
તેમણે વધુમાં કહ્યું કે મહિલાના વર્તનમાં માતૃત્વની કોઈ લાગણી દેખાતી નહોતી અને કોઈ માતા પોતાના બાળક સાથે આટલી નિર્દયતા કેવી રીતે દાખવી શકે તે સમજવું મુશ્કેલ છે.
બે ગુનાઓમાં મળી કુલ 22 વર્ષની સજા
મહિલાએ કોર્ટમાં ગેરઇરાદત હત્યા (Manslaughter) અને બાળક સાથે ક્રૂરતા કરવાના આરોપો સ્વીકારી લીધા હતા. કોર્ટે ગેરઇરાદત હત્યાના ગુનામાં 20 વર્ષની જેલની સજા ફટકારી હતી, જ્યારે બાળક સાથે ક્રૂરતા બદલ અલગથી 2 વર્ષની સજા સંભળાવી હતી.
કોર્ટે બંને સજા સતત ભોગવવાનો આદેશ આપતાં મહિલાને કુલ 22 વર્ષની જેલ ભોગવવી પડશે.