Surat શહેર ભાજપમાં આંતરિક મતભેદો હવે જાહેર વિવાદનું સ્વરૂપ લેતા હોવાના આક્ષેપો સામે આવ્યા છે. ઉત્તર સુરતના ધારાસભ્ય કાંતિ બલરની ઓફિસમાં યોજાયેલી બેઠક દરમિયાન ભાજપના બે નેતાઓ વચ્ચે બોલાચાલી બાદ ઝપાઝપી થઈ હોવાનો દાવો કરવામાં આવ્યો છે. આ ઘટનામાં મહિલા કોર્પોરેટર જયશ્રી વોરા અને તેમના પતિ મનહર વોરાને ઇજાઓ પહોંચી હોવાનું જણાવાયું છે.
સોસાયટીના પ્રશ્નોની ચર્ચા દરમિયાન વિવાદ
મળતી માહિતી મુજબ, વોર્ડ નંબર-5માં આવેલી ભટની વાડી સોસાયટીના પડતર પ્રશ્નો અને ડિમોલિશન સંબંધિત મુદ્દાઓ અંગે ચર્ચા કરવા માટે બેઠક બોલાવવામાં આવી હતી. બેઠકમાં ધારાસભ્ય કાંતિ બલર સહિત સ્થાનિક આગેવાનો અને કોર્પોરેટરો હાજર રહ્યા હતા.
સ્થાનિક આગેવાનો પોતાની રજૂઆત કરીને બહાર નીકળ્યા બાદ બેઠકમાં હાજર નેતાઓ વચ્ચે સંકલન અને આમંત્રણના મુદ્દે ચર્ચા શરૂ થઈ હતી. આ દરમિયાન મનહર વોરાએ ટીપી કમિટીના ચેરમેન મહેન્દ્ર દેસાઈ સામે પક્ષપાતના આક્ષેપો કર્યા હોવાનો દાવો કરવામાં આવ્યો છે.
ખુરશી વડે હુમલાનો આક્ષેપ
મનહર વોરા અને જયશ્રી વોરાએ આક્ષેપ કર્યો છે કે બોલાચાલી ઉગ્ર બન્યા બાદ મહેન્દ્ર દેસાઈએ ખુરશી ઉપાડી હુમલો કરવાનો પ્રયાસ કર્યો હતો. આ ઘટનામાં બંનેને હાથ અને આંગળીના ભાગે ઇજાઓ પહોંચી હોવાનું જણાવાયું છે. ત્યારબાદ તેઓ સારવાર માટે હોસ્પિટલ પહોંચ્યા હતા.
સંગઠન સમક્ષ કરી રજૂઆત
મનહર વોરાના જણાવ્યા મુજબ, ઘટનાની જાણ પોલીસને કરવાનો પ્રયાસ કરવામાં આવ્યો હતો. ત્યારબાદ પક્ષના ઉચ્ચ નેતાઓ સાથે ચર્ચા કરીને સંગઠન સ્તરે લેખિત રજૂઆત કરવામાં આવી છે. પ્રદેશ અધ્યક્ષ, પ્રદેશ મહામંત્રી અને અન્ય શહેરના નેતાઓને સમગ્ર ઘટનાની માહિતી આપી યોગ્ય કાર્યવાહી કરવાની માંગ કરવામાં આવી છે.
ભાજપમાં આંતરિક ખેંચતાણની ચર્ચા
આ ઘટનાએ સુરત (Surat) ભાજપમાં ચાલી રહેલા આંતરિક મતભેદોની ચર્ચાને વધુ વેગ આપ્યો છે. જોકે, આક્ષેપો અંગે ટીપી કમિટીના ચેરમેન મહેન્દ્ર દેસાઈ, ધારાસભ્ય કાંતિ બલર અથવા ભાજપ તરફથી સત્તાવાર પ્રતિક્રિયા જાહેર કરવામાં આવી નથી.