ગાંધીનગર: આમ આદમી પાર્ટીના ડેડિયાપાડાના ધારાસભ્ય ચૈતર વસાવાને વિધાનસભા તરફથી આગામી સત્રમાં હાજર રહેવા માટે નિમંત્રણ મોકલવામાં આવ્યું હોવાની માહિતી સામે આવી છે. હાલ ચૈતર વસાવા સાત વર્ષની સજાના કેસમાં જેલમાં છે. આવી સ્થિતિમાં વિધાનસભામાં હાજરી આપવા માટે તેમને કોર્ટમાંથી કાયદેસરની રાહત મેળવવી પડશે.
નિમંત્રણ મળ્યું, પરંતુ કોર્ટની મંજૂરી જરૂરી
ચૈતર વસાવા તરફથી કોર્ટમાં સત્ર દરમિયાન હાજરી માટે વચગાળાના જામીન અથવા જરૂરી પરવાનગી માગવામાં આવી શકે છે. વિધાનસભા તરફથી મળેલું સત્તાવાર નિમંત્રણ તેમના માટે કોર્ટ સમક્ષ મહત્વનો આધાર બની શકે છે. જોકે, માત્ર નિમંત્રણ મળવાથી તેઓ આપમેળે વિધાનસભામાં હાજરી આપી શકશે નહીં. અંતિમ નિર્ણય કોર્ટની મંજૂરી પર નિર્ભર રહેશે.
વડોદરામાં હિટ એન્ડ રનનો ભેદ ગણતરીના કલાકોમાં ઉકેલાયો : CCTV અને ટોલ ડેટાથી લાલ i20 કાર સુધી પહોંચી છાણી પોલીસ
અગાઉ પણ સત્રમાં હાજરી માટે મળ્યા હતા જામીન
અગાઉ પણ ચૈતર વસાવાને વિધાનસભાના સત્રમાં હાજરી આપવા માટે કોર્ટમાંથી વચગાળાના જામીન મળ્યા હતા. 2025માં તેમને ત્રણ દિવસ માટે જામીન આપવામાં આવ્યા હતા, જેથી તેઓ વિધાનસભાના ચોમાસુ સત્રમાં હાજરી આપી શકે. આ અગાઉના કોર્ટના નિર્ણયનો આધાર લઈને આ વખતે પણ તેમના તરફથી સત્રમાં હાજરી માટે રાહત માગવામાં આવે તેવી શક્યતા છે.
ભાવનગર નકલી દારૂકાંડ : વધુ એક આરોપી ઝડપાયો, કુલ ધરપકડનો આંકડો 38
હાલની કાનૂની સ્થિતિ અલગ
જોકે, હાલની કાનૂની સ્થિતિ અગાઉના કેસથી અલગ છે. ચૈતર વસાવાને સાત વર્ષની સજા ફટકારવામાં આવી છે અને ગુજરાત હાઇકોર્ટે તાજેતરમાં તેમની સજા પર સ્ટે મૂકવાની અરજી ફગાવી દીધી હતી. તેથી હવે તેઓ વિધાનસભામાં બેસી શકશે કે નહીં તેનો નિર્ણય તેમની સભ્યપદની કાનૂની સ્થિતિ તેમજ કોર્ટ દ્વારા આપવામાં આવતી રાહત પર નિર્ભર રહેશે.
હાલ વિધાનસભાનું નિમંત્રણ મળતાં ચૈતર વસાવાની આગામી કાનૂની કાર્યવાહી પર સૌની નજર છે. જો કોર્ટ સત્ર પૂરતી મર્યાદિત રાહત આપે તો તેઓ ગૃહમાં હાજરી આપી શકે છે; અન્યથા જેલમાંથી સત્રમાં હાજરી આપવી શક્ય નહીં બને.