મુંબઈ: મહારાષ્ટ્રમાં સતત વરસી રહેલા ભારે વરસાદની સૌથી મોટી અસર પશ્ચિમ રેલવેના ટ્રેન વ્યવહાર પર જોવા મળી છે. મુંબઈ અને આસપાસના વિસ્તારોમાં ટ્રેક પર વરસાદી પાણી ભરાઈ જતાં મુંબઈ-અમદાવાદ-દિલ્હી સહિતના મહત્વના રેલ રૂટ પર ટ્રેન વ્યવહાર ગંભીર રીતે પ્રભાવિત થયો છે. પરિણામે પશ્ચિમ રેલવેને 49 ટ્રેનો રદ કરવાની ફરજ પડી હતી, જ્યારે અનેક ટ્રેનોના રૂટ, સમય અને અંતિમ સ્ટેશનમાં ફેરફાર કરવામાં આવ્યો હતો.

49 ટ્રેનો રદ, 87થી વધુ ટ્રેનોના સંચાલનમાં ફેરફાર

પશ્ચિમ રેલવે દ્વારા જાહેર કરવામાં આવેલી માહિતી અનુસાર વરસાદી પરિસ્થિતિને ધ્યાનમાં રાખીને કુલ 49 ટ્રેનો સંપૂર્ણપણે રદ કરવામાં આવી હતી.

આ ઉપરાંત,

• 23 ટ્રેનોને ડાયવર્ટ કરવામાં આવી.

• 29 ટ્રેનોને શોર્ટ ટર્મિનેટ કરવામાં આવી.

• 15 ટ્રેનોને રી-શિડ્યૂલ કરાઈ.

• 20 ટ્રેનોના નિયત સ્ટેશનમાં ફેરફાર કરવામાં આવ્યો.

લાંબા અંતરની અનેક ટ્રેનો તેમના નિયત સમય કરતાં 8થી 9 કલાક સુધી મોડી ચાલી હતી.

7,135 મુસાફરોને ₹52.65 લાખનું રીફંડ ચૂકવાયું

ટ્રેનો રદ થતાં અથવા મુસાફરી પ્રભાવિત થતાં પશ્ચિમ રેલવે દ્વારા મુસાફરોને તાત્કાલિક રાહત આપવામાં આવી હતી.

રેલવેના જણાવ્યા મુજબ કુલ7,135 મુસાફરોને ₹52.65 લાખનું રીફંડચૂકવવામાં આવ્યું હતું. મુસાફરોને રીફંડ પ્રક્રિયામાં મુશ્કેલી ન પડે તે માટે ઓનલાઈન અને ઓફલાઈન બંને માધ્યમથી કાર્યવાહી ઝડપી બનાવવામાં આવી હતી.

1.27 લાખ મુસાફરોને મોકલાયા બલ્ક SMS

મુસાફરોને ટ્રેનની વાસ્તવિક સ્થિતિ અંગે સમયસર માહિતી મળી રહે તે માટે પશ્ચિમ રેલવે દ્વારા વિશેષ વ્યવસ્થા કરવામાં આવી હતી.

કુલ 99 ટ્રેનોના લગભગ 1.27 લાખ મુસાફરોને બલ્ક SMS મોકલીને ટ્રેન રદ, વિલંબ, ડાયવર્ઝન અને રી-શિડ્યૂલ અંગેની માહિતી આપવામાં આવી હતી.

રેલવે અધિકારીઓએ જણાવ્યું કે મુસાફરોને સ્ટેશન સુધી બિનજરૂરી ધક્કા ન ખાવા પડે તે માટે ડિજિટલ માધ્યમનો વ્યાપક ઉપયોગ કરવામાં આવ્યો હતો.

19 હજાર મુસાફરોને ભોજન અને પીવાના પાણીની વ્યવસ્થા

વરસાદને કારણે વિવિધ સ્ટેશનો પર લાંબા સમય સુધી ટ્રેનો રોકી રાખવામાં આવી હતી. આવી સ્થિતિમાં મુસાફરોને મુશ્કેલી ન પડે તે માટે પશ્ચિમ રેલવે દ્વારા વિશેષ રાહત વ્યવસ્થા ગોઠવવામાં આવી હતી.

27 ટ્રેનોમાં મુસાફરી કરી રહેલા આશરે 19 હજાર મુસાફરોને ફૂડ પેકેટ અને પીવાનું પાણી વિતરણ કરવામાં આવ્યું હતું.

ખાસ કરીને મહિલાઓ, વરિષ્ઠ નાગરિકો અને બાળકોને પ્રાથમિકતા આપીને મદદ પહોંચાડવામાં આવી હતી.

1,020 મુસાફરો માટે બસોની પણ વ્યવસ્થા

આંશિક અથવા સંપૂર્ણ રીતે રદ થયેલી ટ્રેનોના મુસાફરો માટે વૈકલ્પિક પરિવહનની પણ વ્યવસ્થા કરવામાં આવી હતી.

કુલ 1,020 મુસાફરો માટે 17 બસો દોડાવવામાં આવી, જેથી તેઓ પોતાના ગંતવ્ય સુધી પહોંચી શકે.

10 સ્ટેશનો પર હેલ્પલાઇન ડેસ્ક કાર્યરત

મુસાફરોને જરૂરી માહિતી અને મદદ મળી રહે તે માટે પશ્ચિમ રેલવે દ્વારા 10 મહત્વના સ્ટેશનો પર હેલ્પલાઇન ડેસ્ક શરૂ કરવામાં આવ્યા હતા.

આ ડેસ્ક પર ટ્રેનની સ્થિતિ, રીફંડ, વૈકલ્પિક ટ્રેનો અને અન્ય માહિતી આપવામાં આવી રહી હતી.

ગુજરાત, રાજસ્થાન અને મધ્યપ્રદેશમાં પણ ટ્રેનો અટકાવવામાં આવી

મુંબઈ તરફ જતી અને મુંબઈમાંથી નીકળતી ટ્રેનોના સંચાલન પર અસર થતાં માત્ર મહારાષ્ટ્ર જ નહીં પરંતુ ગુજરાત, રાજસ્થાન અને મધ્યપ્રદેશના અનેક સ્ટેશનો પર પણ ટ્રેનોને રોકી દેવાની ફરજ પડી હતી.

મુંબઈમાં ટ્રેક પર પાણી ભરાયેલા હોવાથી ટ્રેનોને સુરક્ષાના કારણોસર આગળ જવાની મંજૂરી આપવામાં આવી નહોતી.

ધીમે ધીમે સામાન્ય બની રહ્યો છે ટ્રેન વ્યવહાર

સોમવારે મોડી રાત્રે વરસાદનું પ્રમાણ ઘટતાં ટ્રેક પરથી પાણી ઉતારવાની કામગીરી શરૂ કરવામાં આવી હતી. ત્યારબાદ મંગળવારથી ટ્રેન સેવા ધીમે ધીમે પુનઃ શરૂ કરવામાં આવી છે.

તેમ છતાં હજુ પણ અનેક ટ્રેનો તેમના નિયત સમય કરતાં કલાકો મોડી ચાલી રહી છે અને સંપૂર્ણ સ્થિતિ સામાન્ય થવામાં થોડો સમય લાગી શકે છે.

મુસાફરોને રેલવેની અપીલ

પશ્ચિમ રેલવેએ મુસાફરોને મુસાફરી પહેલાં પોતાની ટ્રેનની સ્થિતિ સત્તાવાર વેબસાઇટ, મોબાઇલ એપ અથવા હેલ્પલાઇન મારફતે ચકાસવાની સલાહ આપી છે.

સાથે જ હવામાનની સ્થિતિને ધ્યાનમાં રાખીને આગામી દિવસોમાં પણ ટ્રેનના સમયપત્રકમાં ફેરફાર થઈ શકે તેવી શક્યતા વ્યક્ત કરવામાં આવી છે.