ખાસ વાત એ છે કે, આ સમગ્ર સિરીઝનો મોટો ભાગ ગુજરાતમાં રમાવાનો હોવાથી ક્રિકેટપ્રેમીઓને બંને યુવા ખેલાડીઓને નજીકથી જોવાની તક મળશે. BCCIની મેન્સ સિલેક્શન કમિટીએ ઓસ્ટ્રેલિયા અંડર-19 ટીમના ભારત પ્રવાસ માટે અલગ-અલગ વનડે અને મલ્ટી-ડે ટીમોની જાહેરાત કરી છે. ત્રણ વનડે મેચ રાજકોટમાં રમાશે, જ્યારે પ્રથમ મલ્ટી-ડે મેચ પણ રાજકોટમાં યોજાશે. બીજી મલ્ટી-ડે મેચ અમદાવાદના બી ગ્રાઉન્ડ ખાતે રમાવાની છે. આ સિરીઝ 18 સપ્ટેમ્બરથી શરૂ થશે.

સેહવાગઅને દ્રવિડની નવી પેઢી પર સૌની નજર

સેહવાગના પુત્ર આર્યવીર સેહવાગને ભારત અંડર-19 ટીમમાં મહત્વપૂર્ણ તક મળી છે. આ પસંદગી સાથે સેહવાગ પરિવારની નવી પેઢી હવે રાષ્ટ્રીય સ્તરે પોતાની ઓળખ મજબૂત કરવાની દિશામાં આગળ વધી રહી છે. આર્યવીરની પસંદગીને તેમની યુવા ક્રિકેટ કારકિર્દી માટે મહત્વપૂર્ણ પગલું માનવામાં આવી રહ્યું છે. બીજી તરફ, રાહુલ દ્રવિડના પુત્ર અન્વય દ્રવિડ વિકેટકીપર તરીકે વનડે ટીમમાં સ્થાન જાળવી રાખવામાં સફળ રહ્યા છે. અન્વય અગાઉ પણ ભારતની અંડર-19 ટીમનો ભાગ રહી ચૂક્યા છે અને હવે ઓસ્ટ્રેલિયા જેવી મજબૂત યુવા ટીમ સામે પોતાની ક્ષમતા સાબિત કરવાની તેમને વધુ એક તક મળશે.

ઓસ્ટ્રેલિયાએ સંજય બાંગરની ટ્રાન્સજેન્ડર સંતાન અનાયા માટે ખોલ્યો રસ્તો : હજુ BCCIએ ટ્રાન્સજેન્ડર મહિલા ક્રિકેટ અંગે નથી જાહેર કરી નીતિ!

ગુજરાતમાં રમાશે પાંચમાંથી ચાર મેચ

ભારત અને ઓસ્ટ્રેલિયાની અંડર-19 સિરીઝમાં કુલ ત્રણ વનડે અને બે મલ્ટી-ડે મેચ રમાશે. ત્રણેય વનડે મેચ રાજકોટમાં યોજાશે. ત્યારબાદ 27થી 30 સપ્ટેમ્બર દરમિયાન પ્રથમ મલ્ટી-ડે મેચ પણ રાજકોટમાં રમાશે. સિરીઝની બીજી અને અંતિમ મલ્ટી-ડે મેચ 5થી 8 ઓક્ટોબર દરમિયાન અમદાવાદના બી ગ્રાઉન્ડ ખાતે રમાશે. આમ, ઓસ્ટ્રેલિયા અંડર-19 ટીમનો સમગ્ર ભારત પ્રવાસ ગુજરાતના બે મુખ્ય શહેરો રાજકોટ અને અમદાવાદમાં કેન્દ્રિત રહેશે.

18 સપ્ટેમ્બરથી શરૂ થશે વનડે મુકાબલા

ઓસ્ટ્રેલિયા અંડર-19 સામે ભારતની પ્રથમ વનડે મેચ 18 સપ્ટેમ્બર, 2026ના રોજ રાજકોટમાં રમાશે. બીજી મેચ 21 સપ્ટેમ્બરે અને ત્રીજી મેચ 23 સપ્ટેમ્બરે યોજાશે. વનડે સિરીઝ બાદ બંને ટીમો લાંબા ફોર્મેટમાં આમને-સામને આવશે. પ્રથમ મલ્ટી-ડે મેચ 27થી 30 સપ્ટેમ્બર દરમિયાન રાજકોટમાં રમાશે, જ્યારે બીજી મેચ 5થી 8 ઓક્ટોબર દરમિયાન અમદાવાદમાં યોજાશે.

દિવસે ક્રિકેટ અને રાત્રે હોટલ રૂમમાં ચાલતો હતો બીજો ખેલ! : ક્રિકેટ ટૂર પર ચાલતી હતી 'રિલેશનની રેસ'! 650થી વધુ મહિલાઓ સાથે સંબંધ બનાવ્યાનો ક્રિકેટરનો દાવો

વનડે ટીમની કમાન લક્ષ્‍ય રાયચંદાનીને

BCCIએ જાહેર કરેલી માહિતી મુજબ, ભારતની અંડર-19 વનડે ટીમની કમાન લક્ષ્‍ય રાયચંદાનીને સોંપવામાં આવી છે, જ્યારે યશબર્ધન ચૌહાણને ઉપ-કપ્તાન બનાવવામાં આવ્યા છે. મલ્ટી-ડે ટીમમાં યશબર્ધન ચૌહાણ કેપ્ટન રહેશે અને લક્ષ્‍ય રાયચંદાની ઉપ-કપ્તાનની જવાબદારી સંભાળશે. બંને ફોર્મેટ માટે અલગ નેતૃત્વની પસંદગીથી ભારતીય ટીમ મેનેજમેન્ટ યુવા ખેલાડીઓને વિવિધ જવાબદારીઓ માટે તૈયાર કરવા માંગતું હોવાનું માનવામાં આવે છે.

વનડે ટીમમાં આર્યવીર અને અન્વય, મલ્ટી-ડે ટીમમાં સ્થાન નથી

એક મહત્વપૂર્ણ બાબત એ છે કે, આર્યવીર સેહવાગ અને અન્વય દ્રવિડ બંનેને ઓસ્ટ્રેલિયા સામેની ત્રણ મેચની વનડે ટીમમાં પસંદ કરવામાં આવ્યા છે. જોકે બંને ખેલાડીઓ મલ્ટી-ડે ફિક્સચર માટે જાહેર કરાયેલી અલગ ટીમનો ભાગ નથી. આથી બંને યુવા ખેલાડીઓ માટે રાજકોટમાં યોજાનારી વનડે સિરીઝ ખાસ મહત્વ ધરાવશે. મજબૂત આંતરરાષ્ટ્રીય વિરોધી સામેનું પ્રદર્શન તેમની આગળની પસંદગી અને ક્રિકેટ કારકિર્દી માટે મહત્વપૂર્ણ બની શકે છે.

ગુજરાતના ક્રિકેટપ્રેમીઓ માટે ખાસ તક

રાજકોટ અને અમદાવાદ છેલ્લા કેટલાક વર્ષોમાં મોટા આંતરરાષ્ટ્રીય તથા સ્થાનિક ક્રિકેટ મુકાબલાઓના મહત્વપૂર્ણ કેન્દ્ર તરીકે ઉભરી આવ્યા છે. હવે ભારતની અંડર-19 ટીમના આ આંતરરાષ્ટ્રીય મુકાબલાઓ પણ ગુજરાતમાં યોજાતા યુવા ક્રિકેટપ્રેમીઓમાં ઉત્સાહ જોવા મળી શકે છે. સેહવાગ અને દ્રવિડ જેવા ભારતીય ક્રિકેટના બે મોટા નામોના પુત્રોને એક જ ટીમમાં રમતા જોવાનો રસ પણ આ સિરીઝને ખાસ બનાવશે. જોકે બંને યુવા ખેલાડીઓ પર તેમના પિતાની ઓળખ કરતાં પોતાના પ્રદર્શનના આધારે આગળ વધવાની જવાબદારી રહેશે.

ભારતની વનડે U-19 ટીમ

લક્ષ્‍ય રાયચંદાની (કેપ્ટન), યશબર્ધન ચૌહાણ (ઉપ-કપ્તાન), રજત બાઘેલ (વિકેટકીપર), આર્યવીર સેહવાગ, વી.કે. વિનીત, કુશાગ્ર ઓઝા, અર્જુન રાજપૂત, મનાલ ચૌહાણ, અન્વય દ્રવિડ (વિકેટકીપર), વી. યશવીર, રોહિત યાદવ, શાવિન વિનોદ, મોહિત ઉલવા, ચિગુરુપતિ વેંકટ અને કાવ્યા પટેલનો ટીમમાં સમાવેશ કરવામાં આવ્યો છે. ભારતીય યુવા ક્રિકેટ માટે આ સિરીઝ માત્ર એક સામાન્ય દ્વિપક્ષીય મુકાબલો નથી. ઓસ્ટ્રેલિયા સામેનું પ્રદર્શન આગામી આંતરરાષ્ટ્રીય ટુર્નામેન્ટ્સ અને ખેલાડીઓની વ્યક્તિગત પ્રગતિ માટે પણ મહત્વ ધરાવશે. હવે સૌની નજર રાજકોટમાં 18 સપ્ટેમ્બરથી શરૂ થનારી સિરીઝ પર રહેશે કે સેહવાગ અને દ્રવિડની નવી પેઢી ભારતીય જર્સીમાં કેવી શરૂઆત કરે છે.