અરવલ્લી જિલ્લામાં સ્વચ્છતા અને કચરાના વૈજ્ઞાનિક નિકાલને વધુ વેગ આપવા માટે વહીવટી તંત્ર સક્રિય બન્યું છે. જેના ભાગરૂપે અરવલ્લી કલેક્ટરે મોડાસા ખાતે આવેલા ઘન કચરા (સોલિડ વેસ્ટ) યુનિટની અચાનક સ્થળ મુલાકાત લીધી હતી. આ મુલાકાત દરમિયાન તેમણે આગામી સમયમાં તૈયાર થનાર નવા અત્યાધુનિક ઘન કચરા વ્યવસ્થાપન યુનિટ માટે પ્રસ્તાવિત સ્થળનું બારીકાઈથી નિરીક્ષણ કર્યું હતું.
કલેક્ટરે સ્થળની ભૌગોલિક સ્થિતિ અને ક્ષમતાની સમીક્ષા કરી હતી અને કચરાના યોગ્ય નિકાલ માટે આધુનિક ટેકનોલોજીનો ઉપયોગ કરવા તેમજ સફાઈ વ્યવસ્થા વધુ સુદ્રઢ બનાવવા સંબંધિત અધિકારીઓને મહત્વપૂર્ણ સૂચનો અને માર્ગદર્શન પૂરું પાડ્યું હતું.