ICC: નિગાર સુલતાનાની શિસ્તભંગની કાર્યવાહી: શ્રીલંકા સામે હાર બાદ બાંગ્લાદેશી કેપ્ટનને મળ્યો ડિમેરિટ પોઈન્ટ

ક્રિકેટના મેદાન પર ઘણીવાર ખેલાડીઓ ઉત્સાહ કે હતાશામાં પોતાના આવેગ પર કાબૂ ગુમાવી દેતા હોય છે, પરંતુ આ વર્તન ક્યારેક ભારે પડી શકે છે. બાંગ્લાદેશ મહિલા ક્રિકેટ ટીમની કેપ્ટન નિગાર સુલતાના જોટી (Nigar Sultana Joty) સાથે પણ કંઈક આવું જ થયું છે.

મેદાન પર ગુસ્સો બતાવવા બદલ ICCએ તેમની સામે કડક કાર્યવાહી કરી છે.

ICC: ક્રિકેટને 'જેન્ટલમેન ગેમ' કહેવામાં આવે છે અને તેમાં શિસ્તનું પાલન અનિવાર્ય છે. તાજેતરમાં બાંગ્લાદેશ અને શ્રીલંકા વચ્ચે રમાયેલી મહિલા T20 શ્રેણી દરમિયાન બાંગ્લાદેશી કેપ્ટન નિગાર સુલતાનાએ આ શિસ્તનો ભંગ કર્યો હતો. ICC (ઈન્ટરનેશનલ ક્રિકેટ કાઉન્સિલ) એ આચારસંહિતાના ઉલ્લંઘન બદલ નિગાર સુલતાનાને સત્તાવાર રીતે ફટકાર લગાવી છે.

શું હતી સમગ્ર ઘટના?

આ વિવાદ 2 મે, 2026 ના રોજ સિલ્હટમાં બાંગ્લાદેશ અને શ્રીલંકા વચ્ચે રમાયેલી ત્રીજી T20 મેચ દરમિયાન સર્જાયો હતો. બાંગ્લાદેશની ઇનિંગ્સ દરમિયાન જ્યારે નિગાર સુલતાના આઉટ થઈ ત્યારે તે પોતાની વિકેટ ગુમાવવા બદલ અત્યંત હતાશ અને ગુસ્સામાં દેખાતી હતી. પેવેલિયન પરત ફરતી વખતે તેણે ગુસ્સામાં પોતાનું બેટ જોરથી જમીન પર પછાડ્યું હતું.

ICCના જણાવ્યા અનુસાર, નિગારે આર્ટિકલ 2.2નો ભંગ કર્યો છે, જે મેચ દરમિયાન ક્રિકેટના સાધનો (બેટ, પેડ વગેરે) અથવા મેદાનની વસ્તુઓના દુરુપયોગ સાથે સંબંધિત છે.

સજા અને ડિમેરિટ પોઈન્ટ

નિગાર સુલતાનાએ પોતાની ભૂલ સ્વીકારી લીધી છે અને મેચ રેફરી સુપ્રિયા રાની દાસ દ્વારા સૂચવવામાં આવેલી સજાનો સ્વીકાર કર્યો છે, તેથી આ મામલે કોઈ ઔપચારિક સુનાવણીની જરૂર પડી નથી. ICCએ તેને ચેતવણી આપવાની સાથે તેના ડિસિપ્લિન રેકોર્ડમાં એક ડિમેરિટ પોઈન્ટ પણ ઉમેર્યો છે.

નોંધનીય છે કે, છેલ્લા 24 મહિનામાં નિગારનો આ પ્રથમ ગુનો છે. ICCના નિયમો મુજબ, જો કોઈ ખેલાડીના 24 મહિનાના ગાળામાં 4 કે તેથી વધુ ડિમેરિટ પોઈન્ટ્સ થઈ જાય, તો તે સસ્પેન્શન પોઈન્ટ્સમાં ફેરવાઈ જાય છે અને ખેલાડી પર એક કે તેથી વધુ મેચનો પ્રતિબંધ લાગી શકે છે.