IPL 2026: આજે રજત પાટીદારની સેના અને રિયાન પરાગના રજવાડા વચ્ચે જંગ; ગુવાહાટીમાં કોણ મારશે બાજી?

આઈપીએલ 2026ની રોમાંચક સફર હવે તેના 16મા મુકાબલે પહોંચી છે. આજે આસામના ગુવાહાટીમાં સ્થિત બરસાપારા સ્ટેડિયમ ખાતે બે મજબૂત ટીમો, રાજસ્થાન રોયલ્સ (RR) અને રોયલ ચેલેન્જર્સ બેંગલુરુ (RCB) સામસામે ટકરાશે. એક તરફ રિયાન પરાગની કેપ્ટન્સીમાં રાજસ્થાનની ટીમ જીતની હેટ્રિક લગાવી ચૂકી છે, તો બીજી તરફ રજત પાટીદારની આગેવાની હેઠળની RCB પણ અત્યાર સુધી અજેય રહી છે.

આ સીઝન બંને ટીમો માટે નવી ઓળખ લઈને આવી છે. રાજસ્થાન રોયલ્સે લાંબા સમયથી જોડાયેલા રિયાન પરાગને કેપ્ટન્સી સોંપી છે, જે અત્યાર સુધી ખૂબ જ સફળ સાબિત થઈ છે. બીજી તરફ, RCBએ રજત પાટીદાર પર વિશ્વાસ મૂક્યો છે. વિરાટ કોહલી જેવા દિગ્ગજ ખેલાડીની હાજરીમાં પાટીદાર જે રીતે ટીમનું નેતૃત્વ કરી રહ્યા છે તે કાબિલે તારીફ છે. આજના મેચનું મુખ્ય આકર્ષણ 15 વર્ષીય યુવા સેન્સેશન વૈભવ સૂર્યવંશી અને ક્રિકેટના કિંગ વિરાટ કોહલી વચ્ચેની ટક્કર હશે. વૈભવ પોતાની વિસ્ફોટક બેટિંગથી બધાનું ધ્યાન ખેંચી રહ્યો છે.

હેડ-ટુ-હેડ: કોણ છે શક્તિશાળી?

ઈતિહાસ પર નજર કરીએ તો આ બંને ટીમો વચ્ચે હંમેશા કાંટાની ટક્કર જોવા મળી છે.

• કુલ મેચ: 34

• RCBની જીત: 17

• RRની જીત: 14

• પરિણામ વગરની: 03

આંકડાની દ્રષ્ટિએ બેંગલુરુનું પલ્લું થોડું ભારે છે, પરંતુ રાજસ્થાનની વર્તમાન ફોર્મ જોતા આ મેચમાં કોઈ પણ ટીમ બાજી મારી શકે છે.

પિચ રિપોર્ટ અને હવામાન

ગુવાહાટીનું બરસાપારા સ્ટેડિયમ સામાન્ય રીતે હાઈ-સ્કોરિંગ મેચો માટે જાણીતું છે, પરંતુ આ વખતે સ્થિતિ થોડી અલગ હોઈ શકે છે.

• પિચ: છેલ્લા કેટલાક દિવસોથી ખરાબ હવામાનને કારણે પિચ ઢાંકેલી હતી, જેના કારણે શરૂઆતમાં ફાસ્ટ બોલરોને મદદ મળી શકે છે. જેમ જેમ રમત આગળ વધશે, પિચ ધીમી થવાની શક્યતા છે.

• ઝીણી વિગત: ટોસ જીતનાર ટીમ પહેલા ફિલ્ડિંગ પસંદ કરી શકે છે કારણ કે રાત્રે ઝાકળ (Dew) મહત્વનો ભાગ ભજવી શકે છે.

• હવામાન: વરસાદની શક્યતા ઓછી છે, પરંતુ વાદળછાયું વાતાવરણ રહેશે.