MS Dhoni: શું આજે વાનખેડેમાં ગુંજશે 'રોહિત-રોહિત'? હિટમેનની વાપસી પર મેનેજમેન્ટનો મોટો ખુલાસો

આઈપીએલ 2026 હવે તેના નિર્ણાયક તબક્કે પહોંચી ગઈ છે, પરંતુ ક્રિકેટ ચાહકો જે બે ચહેરાઓને જોવા માટે આતુર છે, તે હજુ પણ એક્શનથી દૂર છે. મહેન્દ્ર સિંહ ધોની (MS Dhoni) અને રોહિત શર્મા (Rohit Sharma) ની ઈજાને લઈને મોટા અપડેટ્સ સામે આવ્યા છે.

ચેન્નાઈ સુપર કિંગ્સ (CSK) અને મુંબઈ ઈન્ડિયન્સ (MI) બંને પોઈન્ટ ટેબલમાં સંઘર્ષ કરી રહી છે, ત્યારે આ દિગ્ગજોની ગેરહાજરી ટીમને ભારે પડી રહી છે.

ધોની દિલ્હી સામેની આગામી મેચ પણ ગુમાવશે

એમએસ ધોનીએ આઈપીએલ 2026 માં સીએસકે માટે હજુ સુધી એક પણ મેચ રમી નથી. ચાહકો દરેક મેચ પહેલા આશા રાખે છે કે 'થાલા' મેદાન પર ઉતરશે, પરંતુ હજુ સુધી તેમ થયું નથી. CSK ની આગામી મેચ 6 મે ના રોજ દિલ્હીના અરુણ જેટલી સ્ટેડિયમમાં દિલ્હી કેપિટલ્સ સામે રમાવાની છે.

તાજા અહેવાલો મુજબ, ચેન્નાઈની ટીમ દિલ્હી જવા રવાના થઈ ગઈ છે, પરંતુ ધોની ટીમની સાથે ગયો નથી. તે હાલમાં ચેન્નાઈમાં જ રોકાયો છે, જેનો અર્થ છે કે તે આગામી મેચ પણ રમશે નહીં તે લગભગ નિશ્ચિત છે. ધોની અત્યારે પિંડલી (Calf Injury) ની ઈજાથી પીડાઈ રહ્યો છે, જેના કારણે તે દોડવામાં અસમર્થ છે.

શું ધોની આ સીઝનમાં વાપસી કરી શકશે?

ક્રિકબઝના અહેવાલ મુજબ, ધોની હજુ સીઝનમાંથી સંપૂર્ણપણે બહાર થયો નથી. જો તેની ઈજામાં સુધારો થશે, તો તે ટૂર્નામેન્ટની છેલ્લી કેટલીક મેચોમાં ઉપલબ્ધ થઈ શકે છે. CSK પાસે હજુ 5 મેચ બાકી છે. જોકે ટીમ પ્લેઓફની રેસમાં ઘણી પાછળ છે, પરંતુ ધોનીની વાપસી ટીમનો ઉત્સાહ વધારી શકે છે.

રોહિત શર્મા પર મોટો નિર્ણય: શું આજે વાનખેડેમાં રમશે?

બીજી તરફ, મુંબઈ ઈન્ડિયન્સના ચાહકો માટે આજની મેચ ખૂબ મહત્વની છે. મુંબઈ આજે લખનૌ સુપર જાયન્ટ્સ (LSG) સામે ટકરાશે. રોહિત શર્મા છેલ્લા કેટલાક સમયથી હેમસ્ટ્રિંગની ઈજા સામે ઝઝૂમી રહ્યો છે. જોકે, મેચના એક દિવસ પહેલા રોહિતે મેદાન પર લગભગ એક કલાક સુધી નેટ પ્રેક્ટિસ કરી હતી, જે તેના રમવાના સંકેત આપે છે.