સમગ્ર મામલે ધોળકા રૂરલ પોલીસે ગુનો નોધી વધુ તપાસ હાથ ધરી છે.

આ બનાવની વિગતો એવી છે કે, ધોળકાના ઈંગોલી ગામે એક જ કોમના બે જૂથના યુવકો ક્રિકેટ રમી રહ્યા હતા.તે દરમિયાન ક્રિકેટ રમતા એક શખસને બોલ વાગ્યો હતો જેથી બંને પક્ષો સામસામે આવી ગયા હતા. મામલો ઉગ્ર થતા ઉશ્કેરાયેલા વહિદખાન મજીદખાન પઠાણ નામના શખસે પોતાની પાસે રહેલા હથિયારમાંથી હવામાં ફાયરિંગ કર્યું હતું. જાહેરમાં થયેલા ફાયરિંગને પગલે ભાગદોડ મચી ગઈ હતી. આ બનાવની જાણ થતા જ ધોળકા ડિવિઝનના ડીવાયએસપી, ધોળકા રૂરલ પોલીસ સ્ટેશનનો સ્ટાફ અને એલસીબી સહિતનો પોલીસ કાફલો તાત્કાલિક ઈંગોલી ગામે દોડી ગયો હતો. પોલીસે ગામમાં ચુસ્ત બંદોબસ્ત ગોઠવીને પરિસ્થિતિને કાબૂમાં લીધી હતી. આ બનાવમાં ભોગ બનેલા પક્ષ દ્વારા ધોળકા રૂરલ પોલીસ મથકમાં ફરિયાદ નોંધાવવામાં આવી છે.

આ બનાવ અંગે ધોળકા રૂરલ પોલીસ સ્ટેશનના સૂત્રોએ જણાવ્યું હતું કે, ઘટનાની જાણ થતાં જ પોલીસ કાફલો દોડી ગયો હતો. અને ત્વરિત તપાસ હાથ ધરીને આરોપીની ધરપકડ કરવા તજવીજ હાથ ધરવામાં આવી છે. આરોપીની ધરપકડ બાદ જ હથિયારનું લાયસન્સ હતું કે કેમ તે જાણવા મળશે. ગામમાં હાલ શાંતિ છે. અને પોલીનો બંદોબસ્ત ગોઠવી દેવામાં આવ્યો છે.