આ પહેલનો ઉદ્દેશ્ય નાની ઉંમરે યુવાનોને નેતૃત્વની વધુ તકો પ્રદાન કરવાનો, અનુભવી પ્રોફેશનલ્સના અનુભવનો લાંબા સમય સુધી લાભ ઉઠાવવાનો છે. આની સાથે જ ભારતનાં કોર્પોરેટ કાયદાઓને બદલાતાં વ્યાપારી વાતાવરણને અનુરૂપ બનાવવાનાં છે.

સરળ વ્યાપાર પર પણ ભાર
રિપોર્ટમાં સરળ વ્યાપાર (ઈઝ ઓફ ડૂઇંગ બિઝનેસ) વધારવા પર પણ ખાસ ભાર મૂકવામાં આવ્યો છે. સંસદીય સમિતિએ ભલામણ કરી છે કે કંપનીઓનાં સ્વૈચ્છિક નામ હટાવવાના (સ્ટ્રાઇક ઓફ) કેસોમાં રજિસ્ટ્રારે 60 દિવસની અંદર નિર્ણય લેવો ફરજિયાત બનાવવામાં આવે. સાથે જ આખી પ્રક્રિયાને MCA-21 પોર્ટલ સાથે જોડીને તેને સંપૂર્ણપણે ડિજિટલ અને પારદર્શી બનાવવામાં આવે.

યુવાનોને કોર્પોરેટ નેતૃત્વમાં મળશે વધુ તક
સમિતિનું માનવું છે કે દેશમાં ઝડપથી વધી રહેલાં સ્ટાર્ટઅપ ઇકોસિસ્ટમ અને ઇનોવેશન આધારિત સાહસોને ધ્યાનમાં રાખીને યુવા ઉદ્યોગસાહસિકોને નાની ઉંમરે જ કંપનીઓનું નેતૃત્વ કરવાની તક મળવી જોઈએ. બીજી તરફ, મહત્તમ વય મર્યાદા વધવાથી અનુભવી પ્રોફેશનલ્સ અને ઉદ્યોગ જગતનાં વરિષ્ઠ લોકો વધુ સમય સુધી કંપનીઓના ટોચનાં મેનેજમેન્ટમાં પોતાની સેવાઓ આપી શકશે.

કામગીરીમાં પારદર્શિતા અને કાર્યક્ષમતા વધશે
સમિતિનું કહેવું છે કે આ સુધારાઓનો અમલ કરવાથી માત્ર કંપનીઓની કામગીરીમાં પારદર્શિતા અને કાર્યક્ષમતા જ નહીં વધે, પરંતુ ભારતનું કોર્પોરેટ માળખું પણ વૈશ્વિક ધોરણો મુજબ વધુ આધુનિક, સ્પર્ધાત્મક અને રોકાણકારો માટે આકર્ષક બની શકશે.