નવી દિલ્હી, તા.5 મેસેજિંગ પ્લેટફોર્મ વોટ્સએપે ભારતમાં યુઝર્સની ઉંમરની ચકાસણી કરવા માટે એક નવા ફીચરનું ટેસ્ટિંગ શરૂ કર્યું છે. ભારત સરકારનાં આગામી 'ડિજિટલ પર્સનલ ડેટા પ્રોટેક્શન' (DPDP) એક્ટના નિયમોનું પાલન કરવા માટે આ તૈયારીઓ થઈ રહી છે.
જોકે, આ ટેસ્ટિંગ દરમિયાન કોઈ પણ પૂર્વ ચેતવણી વગર સોમવારે સાંજે ભારત સહિત ઘણાં યુઝર્સના એકાઉન્ટ્સ અચાનક 24 કલાક માટે 'રિવ્યૂ' હેઠળ મુકાઈ ગયાં હતાં, જેનાં કારણે લોકોને વોટ્સએપ વાપરવામાં ભારે અગવડતાનો સામનો કરવો પડ્યો હતો.
કેન્દ્ર સરકારનો DPDP એક્ટ 13 મે, 2027થી અમલમાં આવવાનો છે, જે 18 વર્ષથી ઓછી વયનાં બાળકોનાં ડેટાનો ઉપયોગ કરવા અંગે કડક નિયમો ધરાવે છે. આ કાયદા હેઠળ વોટ્સએપ જેવા પ્લેટફોર્મ્સે સગીરોના ડેટાનો ઉપયોગ કરતાં પહેલાં તેમનાં વાલી કે કાનૂની વાલીની સ્પષ્ટ મંજૂરી લેવી ફરજિયાત રહેશે.
આ ઉપરાંત, કંપનીઓ બાળકોનું ટ્રેકિંગ, બિહેવિયરલ મોનિટરિંગ કે તેમને ટાર્ગેટ કરીને જાહેરાતો દર્શાવી શકશે નહીં. આઈટી સચિવ એસ. કૃષ્ણને સંકેત આપ્યો હતો કે વોટ્સએપનું આ પગલું DPDP એક્ટની સમયસીમા નજીક આવી રહી હોવાથી હોઈ શકે છે.