દેશમાં બફારા અને ગરમીથી અકળાયેલા લોકો માટે હવામાન વિભાગે મોટા સમાચાર આપ્યા છે. ભારતીય હવામાન વિભાગ (IMD) અનુસાર, દેશભરની વાતાવરણીય સિસ્ટમમાં થયેલા ફેરફારોને કારણે ઉત્તર ભારત, પૂર્વ ભારત અને પશ્ચિમ ભારતના મોટાભાગના વિસ્તારોમાં ચોમાસું ફરી સક્રિય થયું છે. હવામાન વિભાગે આજે ઉત્તર પ્રદેશ, બિહાર, દિલ્હી, પંજાબ, ઉત્તરાખંડ, હિમાચલ પ્રદેશ, જમ્મુ-કાશ્મીર, ઝારખંડ, પશ્ચિમ બંગાળ, ઓડિશા, મધ્ય પ્રદેશ, છત્તીસગઢ, ગુજરાત, મહારાષ્ટ્ર, રાજસ્થાન, તમિલનાડુ અને કેરળ સહિત ૧૭ રાજ્યોમાં ભારે વરસાદ અને વાવાઝોડાનું યલો અને ઓરેન્જ એલર્ટ જારી કર્યું છે.

આ સમયગાળા દરમિયાન ૫૦ થી ૭૦ કિલોમીટર પ્રતિ કલાકની ઝડપે વાવાઝોડું ફૂંકાઈ શકે છે. પશ્ચિમ બંગાળના ઉપ-હિમાલયી વિસ્તારોમાં નીચલા સ્તરે ઉપલા હવાનું ચક્રવાતી પરિભ્રમણ (Cyclonic Circulation) ચાલુ છે, જ્યારે જમ્મુ અને તેની આસપાસના વિસ્તારોમાં વેસ્ટર્ન ડિસ્ટર્બન્સ સક્રિય હોવાથી પહાડી અને મેદાની વિસ્તારોમાં એકસાથે હવામાન પલટાયું છે.

ઉત્તર પ્રદેશ અને બિહારમાં નદીઓ ઉભરાવાની ભીતિ

ઉત્તર પ્રદેશ અને બિહારના મોટાભાગના જિલ્લાઓમાં મુશળધાર વરસાદને કારણે જળબંબાકારની સ્થિતિ સર્જાઈ શકે છે. ઉત્તર પ્રદેશના સહારનપુર, મુઝફ્ફરનગર, હરદોઈ, સંભલ, શાહજહાંપુર, બહરાઇચ, આઝમગઢ, ગોંડા, બલિયા અને સીતાપુર સહિતના જિલ્લાઓમાં વાવાઝોડા સાથે ભારે વરસાદની આશંકા છે. લખનૌમાં મહત્તમ તાપમાન ૩૧ ડિગ્રી સુધી ગગડી શકે છે.

બીજી તરફ, બિહારના પશ્ચિમ ચંપારણ, પૂર્વ ચંપારણ, પટના, વૈશાલી, મુઝફ્ફરપુર, દર્ભંગા અને કટિહારમાં ૫૦ કિમીની ઝડપે પવન ફૂંકાવા સાથે મધ્યમથી ભારે વરસાદ પડશે. સતત વરસાદના કારણે નીચાણવાળા વિસ્તારો અને નદીઓના જળસ્તરમાં વધારો થવાની શક્યતા હોવાથી તંત્ર દ્વારા એલર્ટ જારી કરવામાં આવ્યું છે.

પહાડી રાજ્યો અને દિલ્હી-પંજાબનું હવામાન

ઉત્તરાખંડના નૈનિતાલ, હરિદ્વાર, ચમોલી, પિથોરાગઢ અને ઋષિકેશ જેવા પ્રવાસન સ્થળોએ ૬૦ થી ૬૫ કિલોમીટરની ઝડપે તેજ પવન અને ભારે વરસાદનું જોખમ છે. હિમાચલ પ્રદેશના કુલ્લુ, મનાલી, શિમલા અને ચંબામાં તથા જમ્મુ-કાશ્મીરના અનંતનાગ, પૂંચ, રામબન અને ગંદરબલમાં ભારે વરસાદના કારણે ભૂસ્ખલન (Landslide) ની આશંકા વ્યક્ત કરાઈ છે.

રાજધાની દિલ્હીમાં ૩૦ થી ૩૫ કિલોમીટરની ઝડપે પવન ફૂંકાવાની સાથે હળવાથી મધ્યમ વરસાદની શક્યતા છે, જેનાથી મહત્તમ તાપમાન ૩૧ ડિગ્રી સુધી ઘટી શકે છે. પંજાબના હોશિયારપુર, પઠાણકોટ, રૂપનગર અને ભટિંડા જેવા જિલ્લાઓમાં પણ ગાજવીજ સાથે વરસાદની આગાહી કરાઈ છે.

પશ્ચિમ અને દક્ષિણ ભારત: ગુજરાત-મહારાષ્ટ્રમાં મેઘમહેર

પશ્ચિમ ભારતમાં ગુજરાત અને મહારાષ્ટ્રમાં વરસાદની બીજી ઇનિંગ શરૂ થઈ રહી છે. ગુજરાતના દરિયાકાંઠાના અને દક્ષિણ ભાગોમાં ભારે પવન સાથે વરસાદની શક્યતા હોવાથી ખેડૂતો અને માછીમારોને દરિયો ન ખેડવાની સલાહ આપવામાં આવી છે. દક્ષિણ ભારતમાં કેરળ અને તમિલનાડુમાં પણ વરસાદનું જોર વધશે.

મધ્યપ્રદેશના ભોપાલ, ઇન્દોર, ઉજ્જૈન, સતના અને છતરપુર સહિતના વિસ્તારોમાં યલો એલર્ટ આપવામાં આવ્યું છે. જોકે, રાજસ્થાનના જયપુર, બિકાનેર અને જેસલમેર જેવા પશ્ચિમી ભાગોમાં હજુ પણ અસહ્ય ભેજ અને ગરમીનું વાતાવરણ જળવાઈ રહેશે.

હવામાન નિષ્ણાતોના મતે, આગામી સાત દિવસ સુધી ઉત્તર-પૂર્વ ભારત અને આસપાસના વિસ્તારોમાં ચોમાસું સંપૂર્ણપણે મહેરબાન રહેશે.