IPL 2026 માં પાકિસ્તાનનો અવરોધ: શું ઓસ્ટ્રેલિયન ખેલાડીઓ ફાઈનલ પહેલા ભારત છોડી દેશે?
ક્રિકેટ જગતમાં ભારત અને પાકિસ્તાન વચ્ચેની ખેંચતાણ નવી નથી, પરંતુ આ વખતે પાકિસ્તાન ક્રિકેટ બોર્ડ (PCB) એ કંઈક એવું કર્યું છે જેનાથી ઈન્ડિયન પ્રીમિયર લીગ (IPL) ના રોમાંચ પર સંકટના વાદળો ઘેરાયા છે. પાકિસ્તાન પોતાની જે હરકતો માટે જાણીતું છે, તેણે ફરી એકવાર તે સાબિત કરી દીધું છે.
જ્યારે આખું વિશ્વ IPL ના જશ્નમાં ડૂબેલું છે, ત્યારે પાકિસ્તાને એક નવી સીરીઝની જાહેરાત કરીને ખેલાડીઓ અને ફેન્સની ચિંતા વધારી દીધી છે.
નવી સીરીઝ અને સમયની રમત
પાકિસ્તાન સુપર લીગ (PSL) હમણાં જ સમાપ્ત થઈ છે અને હવે પાકિસ્તાન પાસે કોઈ મોટું આયોજન નહોતું. બીજી તરફ, ભારતમાં IPL 2026 તેના અંતિમ ચરણ તરફ આગળ વધી રહી છે. આ દરમિયાન અચાનક PCB એ ઓસ્ટ્રેલિયા સામેની વનડે સીરીઝનું એલાન કરી દીધું છે. નવાઈની વાત એ છે કે આ સીરીઝનો પહેલો મેચ 31 મે ના રોજ રમાવાનો છે.
આ તારીખ એટલા માટે મહત્વની છે કારણ કે 31 મે એ IPL 2026 ની ફાઈનલ રમાવાની છે. પાકિસ્તાન દ્વારા કરવામાં આવેલી આ જાહેરાત સ્પષ્ટપણે દર્શાવે છે કે તેઓ જાણીજોઈને IPL ના આયોજનમાં અડચણ ઊભી કરવા માંગે છે. જો ખેલાડીઓ ઓસ્ટ્રેલિયાની નેશનલ ડ્યુટી માટે પાકિસ્તાન જાય, તો તેઓ IPL ની સૌથી મહત્વની મેચો એટલે કે પ્લેઓફ અને ફાઈનલ ગુમાવી શકે છે.
શું ખેલાડીઓ અધવચ્ચે જ છોડી દેશે સાથ?
- પહેલી વનડે: 31 મે (IPL ફાઈનલનો દિવસ)
- બીજી વનડે: 2 જૂન
- ત્રીજી વનડે: 4 જૂન
આ તમામ મેચો લાહોરના ગદ્દાફી સ્ટેડિયમમાં રમાવાની છે. સવાલ એ છે કે જો કોઈ ઓસ્ટ્રેલિયન ખેલાડીની ટીમ IPL ની ફાઈનલમાં પહોંચે છે, તો તે જ દિવસે પાકિસ્તાનમાં મેચ કેવી રીતે રમી શકશે? શું ક્રિકેટ ઓસ્ટ્રેલિયા (CA) પોતાના ટોચના ખેલાડીઓને પાછા બોલાવી લેશે? જો આવું થાય તો IPL ફ્રેન્ચાઈઝીઓ માટે આ એક બહુ મોટો ઝટકો સાબિત થશે.
ટોપ-4 ટીમોની મુશ્કેલીમાં વધારો
IPL ની ગ્રુપ સ્ટેજની છેલ્લી મેચ 24 મે ના રોજ રમાવાની છે. ત્યારબાદ છ ટીમો ટુર્નામેન્ટમાંથી બહાર થઈ જશે. જે ટીમો બહાર થઈ જશે તેમના ઓસ્ટ્રેલિયન ખેલાડીઓ તો પાકિસ્તાન જઈ શકશે, પરંતુ અસલી સમસ્યા પ્લેઓફમાં પહોંચનારી ટોપ-4 ટીમો માટે છે.
દરેક મોટી IPL ટીમમાં ઓસ્ટ્રેલિયાના મુખ્ય ખેલાડીઓ સામેલ છે, જેઓ ટીમની કરોડરજ્જુ સમાન હોય છે. જો ગ્લેન મેક્સવેલ, મિશેલ સ્ટાર્ક, પેટ કમિન્સ કે ટ્રેવિસ હેડ જેવા ખેલાડીઓ ફાઈનલ જેવી મહત્વની મેચ છોડીને પાકિસ્તાન રવાના થાય, તો તે ટીમની જીતવાની શક્યતાઓ નહિવત થઈ શકે છે. ફ્રેન્ચાઈઝી માલિકો અત્યારે આ બાબતે ગંભીર ચર્ચામાં છે કે કેવી રીતે આ ખેલાડીઓને રોકી શકાય.
પાકિસ્તાનની રણનીતિ પર સવાલો
ક્રિકેટ નિષ્ણાતોનું માનવું છે કે આ સીરીઝ જાન્યુઆરીમાં રમાયેલી T20 સીરીઝનો જ એક ભાગ છે, પરંતુ તેની જાહેરાત અત્યારે કરવી તે શંકા ઉપજાવે છે. અગાઉ આ વનડે સીરીઝ વિશે કોઈ ચોક્કસ પ્લાન નહોતો, પણ અચાનક IPL ના ફાઈનલના દિવસે જ મેચ રાખવી એ પાકિસ્તાનની નકારાત્મક માનસિકતા દર્શાવે છે.
પાકિસ્તાની ખેલાડીઓ પર તો પહેલેથી જ IPL માં રમવા પર પ્રતિબંધ છે, તેથી તેમને કોઈ નુકસાન નથી. પરંતુ તેઓ અન્ય દેશોના ખેલાડીઓને ભારત આવતા અથવા અહીં રમતા રોકવા માટે અવનવા પેતરા અજમાવતા રહે છે.
ક્રિકેટ ઓસ્ટ્રેલિયાનો નિર્ણય શું હશે?
હવે આખા વિશ્વની નજર ક્રિકેટ ઓસ્ટ્રેલિયા (CA) પર છે. ઓસ્ટ્રેલિયન ખેલાડીઓ હંમેશા તેમની નેશનલ ટીમને પ્રાધાન્ય આપે છે, પરંતુ IPL માં મળતા મોટા કોન્ટ્રાક્ટ અને BCCI સાથેના સારા સંબંધોને કારણે બોર્ડ શું નિર્ણય લેશે તે જોવું રસપ્રદ રહેશે. જો ઓસ્ટ્રેલિયા પોતાની ‘B’ ટીમ પાકિસ્તાન મોકલે તો જ IPL નો રોમાંચ જળવાઈ રહેશે.