ઇન્ડિયન પ્રીમિયર લીગની 19મી સીઝનનો છઠ્ઠો મુકાબલો કોલકાતાના ઐતિહાસિક ઈડન ગાર્ડન્સ સ્ટેડિયમમાં રમાયો હતો. આ મેચમાં સનરાઈઝર્સ હૈદરાબાદે કોલકાતા નાઈટ રાઈડર્સને હરાવીને આ સિઝનમાં પોતાની જીતનું ખાતું ખોલ્યું હતું. કેકેઆરની ટીમે ટોસ જીતીને પ્રથમ બોલિંગ કરવાનો નિર્ણય લીધો હતો, ત્યારબાદ હૈદરાબાદે સ્કોરબોર્ડ પર 226 રનનો વિશાળ સ્કોર ખડકી દીધો હતો. રન ચેઝ કરવા ઉતરેલી કેકેઆરની શરૂઆત ખૂબ જ ધમાકેદાર રહી હતી. ફિન એલને પ્રથમ ઓવરમાં જે ગતિએ રન બનાવ્યા તેનાથી હૈદરાબાદની ટીમ દબાણમાં આવી ગઈ હતી, જોકે તે આઉટ થતા જ હૈદરાબાદે મેચમાં વાપસી કરી હતી.

પ્રથમ ઓવરમાં સૌથી વધુ રન બનાવનાર વિદેશી ખેલાડી

ફિન એલન આ મેચમાં અજિંક્ય રહાણે સાથે ઓપનિંગ કરવા ઉતર્યો હતો. મેચના પ્રથમ બોલ પર રહાણેએ એક રન લઈને એલનને સ્ટ્રાઈક આપી હતી. ત્યારબાદ ફિન એલને બાકીના 5 બોલમાં 3 ચોગ્ગા અને 2 છગ્ગા ફટકારીને કુલ 24 રન ઝૂડી કાઢ્યા હતા. આ સાથે જ ફિન એલન IPLના ઇતિહાસમાં મેચની પ્રથમ ઓવરમાં સૌથી વધુ રન બનાવનાર પ્રથમ વિદેશી ખેલાડી બની ગયો છે.

અગાઉ આ રેકોર્ડ તેની જ ટીમના સાથી ખેલાડી સુનીલ નરેનના નામે હતો. નરેને વર્ષ 2018માં રાજસ્થાન રોયલ્સ સામેની મેચમાં પ્રથમ ઓવરમાં 21 રન બનાવ્યા હતા. ફિન એલને માત્ર 7 બોલમાં 28 રન રમીને આ નવો ઈતિહાસ રચ્યો છે.