‘પોતાને વિજેતા જાહેર કરી જંગ ખતમ કરો’: ઈરાનના પૂર્વ મંત્રીની ટ્રમ્પને તેમની જ ભાષામાં જવાબ આપવાની સલાહ
અમેરિકા અને ઈરાન વચ્ચે ચાલી રહેલું યુદ્ધ હવે અત્યંત ખતરનાક વળાંક પર પહોંચી ગયું છે. એક તરફ અમેરિકી રાષ્ટ્રપતિ ડોનાલ્ડ ટ્રમ્પ ઈરાન પર ગ્રાઉન્ડ ઓપરેશન કરવાની તૈયારી કરી રહ્યા છે, ત્યારે બીજી તરફ ઈરાનના પૂર્વ વિદેશ મંત્રી જવાદ ઝરીફે તેહરાનને એક ચોંકાવનારી પણ સમજદારીભરી સલાહ આપી છે.
ઝરીફે કહ્યું છે કે ઈરાને પોતે જ આ યુદ્ધમાં પોતાની જીત જાહેર કરી દેવી જોઈએ અને તાત્કાલિક સીઝફાયર (યુદ્ધવિરામ) તરફ આગળ વધવું જોઈએ.
ઝરીફની રણનીતિ: ‘જીત જાહેર કરો અને સમજૂતી કરો’
જવાદ ઝરીફે સૂચન આપ્યું છે કે જો ડોનાલ્ડ ટ્રમ્પ યુદ્ધ રોકવા માટે તૈયાર ન હોય, તો ઈરાને પોતે પહેલ કરવી જોઈએ. તેમના મતે, ઈરાને દુનિયા સામે એવું સાબિત કરવું જોઈએ કે તેઓ વિજેતા છે અને પછી અમેરિકા સાથે એવી ડીલ કરવી જોઈએ જે ભવિષ્યમાં પણ શાંતિ જાળવી રાખે. શુક્રવારે (3 માર્ચ) આ જંગનો 35મો દિવસ છે, છતાં ઈરાન અત્યારે નમતું જોખવાના મૂડમાં હોય તેવું જણાતું નથી, જેના કારણે તણાવ સતત વધી રહ્યો છે.
હોર્મુઝની વ્યૂહરચના અને પ્રતિબંધોમાંથી મુક્તિ
યુદ્ધને કારણે ઈરાને અત્યારે ‘સ્ટ્રેટ ઓફ હોર્મુઝ’ (હોર્મુઝની સામુદ્રધુની) માં જહાજોની અવરજવર પર રોક લગાવી દીધી છે. ઝરીફે સલાહ આપી છે કે ઈરાને આ માર્ગ ફરીથી ખોલવાની ઓફર આપીને અમેરિકા સાથે સોદાબાજી કરવી જોઈએ. આ ઓફરના બદલામાં ઈરાન પોતાના પર લાગેલા આકરા આર્થિક પ્રતિબંધો હટાવવાની માંગ કરી શકે છે. જો આવું થાય, તો ઈરાનની અર્થવ્યવસ્થાને મોટો ફાયદો મળી શકે છે અને જંગની આર્થિક કિંમત ચૂકવવાથી બચી શકાય છે.
ટ્રમ્પનો ગ્રાઉન્ડ ઓપરેશન પ્લાન અને યુરેનિયમનો ખતરો
બીજી તરફ, ડોનાલ્ડ ટ્રમ્પ ઈરાનના જમીની સ્તર પર હુમલો કરવાની યોજના બનાવી રહ્યા છે. મીડિયા રિપોર્ટ્સ અનુસાર, અમેરિકા ગ્રાઉન્ડ ઓપરેશન દ્વારા ઈરાન પાસે રહેલું યુરેનિયમ જપ્ત કરવા માંગે છે. આ કામગીરી માટે હજારો કમાન્ડો અને ભારે મશીનરીની જરૂર પડી શકે છે. જમીનની નીચે છુપાયેલા યુરેનિયમને બહાર કાઢવું એ અમેરિકા માટે મોટો પડકાર છે, કારણ કે આમાં અઠવાડિયાઓનો સમય લાગી શકે છે અને જાનમાલનું મોટું નુકસાન થવાની પણ ભીતિ છે.