આ રોડ-શો વાઇબ્રન્ટ ગુજરાત સમિટ 2027ના આયોજન પહેલા વૈશ્વિક રાજદ્વારી આલમ અને ભારતીય વ્યાપારી સમુદાય સાથે ગુજરાતના સંબંધોને નવા શિખરે લઈ જશે. કાર્યક્રમના સાંજના મુખ્ય સત્રમાં, ગુજરાતના માનનીય મુખ્યમંત્રી ભૂપેન્દ્રભાઈ પટેલ અને માનનીય નાયબ મુખ્યમંત્રી હર્ષ સંઘવી વિવિધ દેશોના કોન્સ્યુલ જનરલ તથા અગ્રણી ઉદ્યોગ પ્રતિનિધિઓ સાથે સીધો સંવાદ કરશે. તેઓ આગામી સમિટ માટે ગુજરાતના ભવિષ્યલક્ષી વિઝન, નવી ઔદ્યોગિક નીતિઓ અને રાજ્યમાં ઉપલબ્ધ અપાર તકો વિશે દેશ-વિદેશના ઉદ્યોગપતિઓને માહિતગાર કરશે.

CII અને ઉદ્યોગ વિભાગના વડાઓનું મહત્વપૂર્ણ સંબોધન

મુંબઈના આ હાઈ-પ્રોફાઈલ રોડ-શોની શરૂઆત 'કોન્ફેડરેશન ઑફ ઇન્ડિયન ઇન્ડસ્ટ્રી' (CII) ના રાષ્ટ્રીય અધ્યક્ષ આર. મુકુંદનના સ્વાગત પ્રવચન સાથે થશે. ત્યારબાદ, ગુજરાત સરકારના ઉદ્યોગ અને ખાણ વિભાગ (IMD) ના અધિક મુખ્ય સચિવ દ્વારા એક વિશેષ પ્રેઝન્ટેશન રજૂ કરવામાં આવશે. આ પ્રેઝન્ટેશનમાં VGGS 2027 ના મુખ્ય વિષયો, ઈન્ફ્રાસ્ટ્રક્ચર ડેવલપમેન્ટ અને રોકાણ માટેના અગ્રતા ધરાવતા ક્ષેત્રોની વિગતવાર વિગતો આપવામાં આવશે.

કાર્યક્રમ દરમિયાન ગુજરાતમાં સફળતાપૂર્વક ઉદ્યોગ ચલાવતા અગ્રણી ઉદ્યોગપતિઓ પણ રાજ્યના બિઝનેસ-ફ્રેન્ડલી વાતાવરણ અને પોતાના સફળ અનુભવો મંચ પરથી રજૂ કરશે. આ સત્રના અંતે ગુજરાત સરકારના મુખ્ય સચિવ રાજ્યમાં વેપાર-ઉદ્યોગને સુગમ બનાવવા માટે લેવાયેલા નિર્ણયો અંગે સંબોધન કરશે.

દેશના દિગ્ગજ ઉદ્યોગપતિઓ સાથે વન-ઓન-વન બેઠકો

સાંજના મુખ્ય રોડ-શો પહેલાં, મુખ્યમંત્રી ભૂપેન્દ્રભાઈ પટેલ ભારતના ટોચના કોર્પોરેટ જૂથોના વડાઓ અને સીઈઓ સાથે વ્યક્તિગત બેઠકો (One-on-One Meetings) નો દોર યોજશે. આ વન-ટુ-વન બેઠકોમાં દેશ અને દુનિયાની મલ્ટિનેશનલ કંપનીઓ ભાગ લેશે.

જેમાં મુખ્યત્વે નીચે મુજબની અગ્રણી સંસ્થાઓના પ્રતિનિધિઓ સામેલ થશે:

• કોર્પોરેટ દિગ્ગજો: રિલાયન્સ ઇન્ડસ્ટ્રીઝ લિમિટેડ, ટાટા ટ્રસ્ટ્સ, મહિન્દ્રા ગ્રુપ, આદિત્ય બિરલા ગ્રુપ, ગોદરેજ ઈન્ડસ્ટ્રીઝ અને લાર્સન એન્ડ ટુબ્રો (L&T).

• ફાર્મા અને કેમિકલ્સ: સિપ્લા લિમિટેડ, સન ફાર્મા, પિરામલ ગ્રુપ, રોસારી બાયોટેક અને નાયરા એનર્જી.

• હેવી એન્જિનિયરિંગ અને ટેકનોલોજી: AM/NS ઇન્ડિયા, STT ગ્લોબલ ડેટા સેન્ટર્સ, ASSA ABLOY, RPG એન્ટરપ્રાઈઝિસ, કેમટ્રોલ્સ ઇન્ડસ્ટ્રીઝ, બાટલીબોઇ લિમિટેડ, બ્લુ સ્ટાર અને સેન્ટ-ગોબેન.

• રિયલ એસ્ટેટ અને અન્ય: કે રહેજા ગ્રુપ, લોટે ઇન્ડિયા, સ્વાન કોર્પ, કોલ્ટ ડેટા સેન્ટર અને એબોટ ન્યુટ્રિશન.

મુખ્ય ક્ષેત્રો અને યુવા ઉદ્યોગસાહસિકો સાથે રાઉન્ડટેબલ સંવાદ

મુખ્યમંત્રી સાથેની આ વન-ટુ-વન બેઠકોમાં માત્ર પરંપરાગત ઉદ્યોગો જ નહીં પરંતુ ભવિષ્યના ગ્રોથ એન્જિન ગણાતા ક્ષેત્રો પર ધ્યાન કેન્દ્રિત કરવામાં આવશે. જેમાં મુખ્યત્વે એડવાન્સ્ડ મેન્યુફેક્ચરિંગ, ફાર્માસ્યુટિકલ્સ, હેલ્થ અને વેલનેસ, આઈટી તથા ફાઈનાન્શિયલ સર્વિસીસ (GIFT City), ગ્રીન એનર્જી, ઓઈલ અને એનર્જી, બાયોટેકનોલોજી, રિયલ એસ્ટેટ, ઔદ્યોગિક ઓટોમેશન અને પેટ્રોલિયમ જેવા ક્ષેત્રોમાં રોકાણ લાવવા ચર્ચા થશે.

આ ઉપરાંત, આ મુંબઈ પ્રવાસના ભાગરૂપે યુવા ઉદ્યોગસાહસિકો (Young Entrepreneurs) અને સ્ટાર્ટઅપ ફાઉન્ડર્સ સાથે પણ એક વિશેષ રાઉન્ડટેબલ સંવાદનું આયોજન કરવામાં આવ્યું છે. આ સંવાદનો હેતુ નવી પેઢીના સાહસિકોને ગુજરાતમાં પોતાના બિઝનેસ મોડેલ અને ઈનોવેશન લાવવા માટે પ્રોત્સાહિત કરવાનો છે.

રોકાણ માટે ગુજરાતની વિશ્વસનીયતા અને પ્રતિબદ્ધતા

આ તમામ બેઠકો અને રોડ-શોનો મુખ્ય હેતુ ગુજરાતમાં રોકાણની નવી તકો ઊભી કરવાનો, હયાત વ્યવસાયોનો વિસ્તાર કરવાનો અને વ્યૂહાત્મક ભાગીદારી (Strategic Partnerships) ની શક્યતાઓ ચકાસવાનો છે.

ગુજરાત સરકાર પોતાના મજબૂત ઔદ્યોગિક આધાર, વિશ્વસ્તરીય પોર્ટ અને રોડ કનેક્ટિવિટી, આધુનિક ઈન્ફ્રાસ્ટ્રક્ચર, સિંગલ-વિન્ડો ક્લિયરન્સ જેવી રોકાણકાર-અનુકૂળ નીતિઓ તેમજ ટકાઉ (Sustainable) અને ટેક્નોલોજી-આધારિત વિકાસ પ્રત્યેની પોતાની કટિબદ્ધતાને વૈશ્વિક મંચ પર રજૂ કરશે. મુંબઈનો આ રોડ-શો ૨૦૨૭ની વાઇબ્રન્ટ ગુજરાત સમિટને નવી ઊંચાઈઓ પર લઈ જવામાં મહત્વનો માઇલસ્ટોન સાબિત થશે.