અમિત રાય, મુંબઈ મુંબઈમાંથી સામે આવેલા એક ચોંકાવનારા કેસે સોશિયલ મીડિયા જગતમાં હલચલ મચાવી છે. 1.3 મિલિયન ઇન્સ્ટાગ્રામ ફોલોઅર્સ ધરાવતા રીલ સ્ટાર પ્રતીક શિંદે સામે અપહરણ, હુમલો અને ધમકી જેવા ગંભીર આરોપો સાથે FIR નોંધાઈ છે. ઓનલાઈન બેટિંગ એપ્સના પ્રમોશનને લઈને શરૂ થયેલો વિવાદ હવે પોલીસ તપાસ સુધી પહોંચી ગયો છે, જેમાં ચાર આરોપીઓની ધરપકડ પણ થઈ ચૂકી છે.
પોલીસ ફરિયાદ મુજબ, કન્ટેન્ટ ક્રિએટર ચેતન દેવલેકર ઘણા સમયથી ઓનલાઈન બેટિંગ એપ્સના પ્રમોશન સામે સોશિયલ મીડિયા પર અભિયાન ચલાવી રહ્યા હતા. તેઓ લોકોને આવા પ્લેટફોર્મના જોખમો વિશે જાગૃત કરવા માટે વીડિયો બનાવતા હતા. આ દરમિયાન તેમની સોશિયલ મીડિયા પર રીલ સ્ટાર પ્રતીક શિંદે સાથે ઉગ્ર ચર્ચા થઈ હતી. ફરિયાદમાં આરોપ છે કે પ્રતીક શિંદે બેટિંગ એપ્સનું પ્રમોશન કરતો હતો, જ્યારે ચેતન સતત તેનો વિરોધ કરતા હતા. સમય જતાં આ મતભેદ વ્યક્તિગત વિવાદમાં ફેરવાયો અને ત્યારબાદ ગંભીર ઘટનાને અંજામ આપવામાં આવ્યો હોવાનો આરોપ છે.
મોલમાં બોલાવી અપહરણ અને મારપીટ કરવાનો આરોપ
ફરિયાદ અનુસાર લગભગ 15 દિવસ પહેલાં ચેતન દેવલેકરનો ઇન્સ્ટાગ્રામ મારફતે કપડાની દુકાનના પ્રમોશન માટે સંપર્ક કરવામાં આવ્યો હતો. 26 જુલાઈની સાંજે તેઓ પત્ની અને સંબંધીઓ સાથે પવઈના એક મોલમાં પહોંચ્યા હતા. ત્યાં એક ઓળખીતાએ વાતચીત દરમિયાન તેમને રોક્યા અને ત્યારબાદ કથિત રીતે બળજબરીપૂર્વક સ્કોર્પિયો કારમાં બેસાડી અપહરણ કરવામાં આવ્યું. ચેતનનો આરોપ છે કે કારની અંદર તેમની સાથે મારપીટ કરવામાં આવી, ગળું દબાવવાનો પ્રયાસ થયો અને તેમને બેટિંગ એપ્સનું પ્રમોશન કરતા કન્ટેન્ટ ક્રિએટરો વિરુદ્ધ વીડિયો બનાવવાનું બંધ કરવાની ધમકી આપવામાં આવી. ફરિયાદમાં એવો પણ દાવો કરવામાં આવ્યો છે કે આ સમગ્ર ઘટનામાં પ્રતીક શિંદે પણ વાહનમાં હાજર હતો. લગભગ ચાર કલાક સુધી વિવિધ સ્થળોએ લઈ જઈ તેમને અને તેમના પરિવારને ગંભીર પરિણામોની ધમકી આપવામાં આવી હતી.
7 સામે FIR, 4 આરોપીઓની ધરપકડ; તપાસ ચાલુ
ચેતન દેવલેકરની ફરિયાદના આધારે મુંબઈની પવઈ પોલીસે ભારતીય ન્યાય સંહિતા (BNS) હેઠળ અપહરણ, ખોટી રીતે કેદ, હુમલો અને ગુનાહિત ધાકધમકી સહિતની વિવિધ કલમો હેઠળ સાત લોકો સામે કેસ નોંધ્યો છે. તેમાં ચાર નામાંકિત અને ત્રણ અજાણ્યા આરોપીઓનો સમાવેશ થાય છે. પોલીસે પ્રતીક શિંદે, યશ બાબ્રે, અનિકેત ગોડસે અને સમીર કુચેકર (ઉર્ફે એસ.કે.)ની ધરપકડ કરી છે, જેમાંથી ત્રણ આરોપીઓને પુણે જિલ્લાના ભીગવાન વિસ્તારમાંથી ઝડપી લેવામાં આવ્યા હતા. બાકીના ત્રણ આરોપીઓની શોધખોળ ચાલુ છે. પોલીસ હાલમાં સીસીટીવી ફૂટેજ, ઇલેક્ટ્રોનિક પુરાવા અને અન્ય ટેક્નિકલ માહિતીના આધારે સમગ્ર ઘટનાની વિગતવાર તપાસ કરી રહી છે. આરોપોની સત્યતા અંગે અંતિમ નિર્ણય તપાસ અને કોર્ટની કાર્યવાહી બાદ જ સ્પષ્ટ થશે.