ભારતીય અર્થતંત્રે 7.8 ટકાનો વિકાસ દર નોંધાવ્યા બાદ વડાપ્રધાન નરેન્દ્ર મોદીએ દેશવાસીઓને 'સ્વદેશી' અને 'આત્મનિર્ભર ભારત' તરફ વધુ મજબૂતીથી આગળ વધવાની અપીલ કરી છે. સોશિયલ મીડિયા પર શેર કરેલી રિલ દ્વારા PM મોદીએ દેશની ઝડપી આર્થિક પ્રગતિ માટે 140 કરોડ ભારતીયોની સંકલ્પ શક્તિ અને મહેનતની પ્રશંસા કરી હતી. સાથે જ તેમણે નાગરિકોને બિનજરૂરી વિદેશ પ્રવાસ ટાળવા, શક્ય હોય તો વિદેશમાં લગ્ન ન કરવા અને જરૂરિયાત ન હોય તો સોનું ન ખરીદવાની અપીલ કરી છે.
વડાપ્રધાન મોદીએ પોતાના સંદેશમાં 7.8 ટકાનો વિકાસ દર પ્રાપ્ત કરવા બદલ દેશવાસીઓને અભિનંદન પાઠવ્યા હતા. તેમણે કહ્યું કે આજે સમગ્ર વિશ્વ અનેક પડકારોમાંથી પસાર થઈ રહ્યું છે. યુદ્ધની સ્થિતિ, વૈશ્વિક સંકટો, સપ્લાય ચેઈનમાં મુશ્કેલીઓ અને કોવિડ-19 બાદની અસ્થિરતા જેવા પડકારો વચ્ચે પણ ભારતીય અર્થતંત્ર ઝડપથી આગળ વધી રહ્યું છે. PM મોદીના જણાવ્યા અનુસાર, આ સિદ્ધિ પાછળ દેશના નાગરિકોની મહેનત, સંકલ્પ અને પુરુષાર્થ મહત્વપૂર્ણ છે. તેમણે ભારપૂર્વક જણાવ્યું કે ભારતે મુશ્કેલ વૈશ્વિક પરિસ્થિતિ વચ્ચે પણ પોતાની વિકાસયાત્રાને જાળવી રાખી છે.
"બિનજરૂરી વિદેશ પ્રવાસ ન કરો, વિદેશમાં લગ્ન પણ ટાળો"
વડાપ્રધાને દેશના નાગરિકોને 'વોકલ ફોર લોકલ'ના મંત્રને જીવનમાં અપનાવવાની અપીલ કરી હતી. તેમણે કહ્યું કે જો કોઈ પ્રવાસ ખરેખર જરૂરી ન હોય તો બિનજરૂરી વિદેશ પ્રવાસ કરવાથી બચવું જોઈએ. એટલું જ નહીં, જો શક્ય હોય તો લગ્ન જેવા મોટા સામાજિક પ્રસંગો માટે પણ વિદેશને બદલે ભારતને પસંદ કરવું જોઈએ. PM મોદીના મતે, દેશમાં જ ખર્ચ થવાથી સ્થાનિક વેપારીઓ, નાના ઉદ્યોગો, હોટેલ, કેટરિંગ, પરિવહન અને અન્ય અનેક ક્ષેત્રોને તેનો સીધો લાભ મળી શકે છે. આ રીતે વ્યક્તિગત ખર્ચ પણ દેશની અર્થવ્યવસ્થાને મજબૂત કરવામાં ફાળો આપી શકે છે.