વૈભવ શ્રીવાસ્તવ, દિલ્હીમહારાષ્ટ્રમાં સતત પડી રહેલા મુશળધાર વરસાદને કારણે રેલવે સેવાઓ પર માઠી અસર પડી છે. મધ્ય રેલવેના કરજત-ખોપોલી રેલવે સેક્શન પર ભારે વરસાદ અને પાણીના પ્રવાહને કારણે રેલવે ટ્રેકની નીચેથી કપચી ધોવાઈ ગઈ છે, જેને કારણે સુરક્ષાને ધ્યાનમાં રાખીને આ રૂટ પર ટ્રેન સેવાઓ તાત્કાલિક અસરથી સ્થગિત કરી દેવામાં આવી છે.
યુદ્ધના ધોરણે સમારકામ કાર્ય શરૂરેલવે પ્રશાસને અસરગ્રસ્ત ટ્રેક પર એન્જિનિયરિંગ અને ટેકનિકલ ટીમોને તાત્કાલિક રવાના કરી દીધી છે. ટ્રેકનું સમારકામ, નવી કપચી નાખવી અને લાઈનની સુરક્ષા સુનિશ્ચિત કરવાનું કામ યુદ્ધના ધોરણે શરૂ કરવામાં આવ્યું છે. ટ્રેન સેવાઓ વહેલી તકે પુનઃસ્થાપિત કરવા માટે જરૂરી મશીનરી અને સંસાધનો ઘટનાસ્થળે પહોંચાડવામાં આવી રહ્યા છે.
અધિકારીઓએ સ્પષ્ટ કર્યું છે કે, સમારકામ પૂર્ણ થયા બાદ ટ્રેકનું ઝીણવટભર્યું નિરીક્ષણ કરવામાં આવશે. તમામ ટેકનિકલ માપદંડો ચકાસ્યા બાદ જ આ માર્ગ પર ટ્રેન વ્યવહાર ફરી શરૂ કરવામાં આવશે. સુરક્ષા સાથે કોઈ પણ પ્રકારની બાંધછોડ કરવામાં આવશે નહીં.
મુસાફરો માટે સૂચનારેલ સેવા પ્રભાવિત થવાને કારણે દૈનિક મુસાફરોને ભારે હાલાકીનો સામનો કરવો પડી રહ્યો છે. રેલવે તંત્રએ મુસાફરોને અપીલ કરી છે કે, તેઓ પ્રવાસ પર નીકળતા પહેલા ટ્રેનની સ્થિતિ તપાસી લે અને રેલવે દ્વારા આપવામાં આવતા અધિકૃત અપડેટ્સ પર નજર રાખે.
હવામાન વિભાગે મહારાષ્ટ્રના અનેક વિસ્તારોમાં હજુ પણ ભારેથી અતિભારે વરસાદની આગાહી કરી છે. આ પરિસ્થિતિને જોતા રેલવે પ્રશાસન સમગ્ર નેટવર્ક પર ચાંપતી નજર રાખી રહ્યું છે અને સંવેદનશીલ સ્થળોએ વધારાના કર્મચારીઓ તૈનાત કરવામાં આવ્યા છે. હાલમાં રેલવે દ્વારા મુસાફરોને સહયોગ અને ધીરજ રાખવા વિનંતી કરવામાં આવી છે.