ભાવનગર જિલ્લાના મહુવા પંથકમાં મેઘરાજાની મહેર અને ઉપરવાસમાં થયેલા ભારે વરસાદને પગલે જીવાદોરી સમાન માલણ ડેમ સંપૂર્ણ ભરાઈ ગયો છે. લાંબા સમયની પ્રતિક્ષા બાદ ડેમ ઓવરફ્લો થતા ખેડૂતો અને સ્થાનિક રહીશોમાં આનંદની લાગણી જોવા મળી રહી છે. ડેમની સપાટી ભયજનક સ્તરને વટાવતા જ તંત્ર દ્વારા તકેદારીના ભાગરૂપે તાત્કાલિક અસરથી ડેમના 4 દરવાજા ખોલી નાખવામાં આવ્યા છે, જેથી પાણીનો નિકાલ સુરક્ષિત રીતે થઈ શકે.
10 ગામોને કરાયા સાવધવહીવટી તંત્ર દ્વારા ડેમની નજીક અને નદીના પટમાં આવેલા કુલ 10 ગામોને સાવચેત રહેવા આદેશ આપવામાં આવ્યા છે. જેમાં મોટાખુટવડા, ગોરસ, સાંગાણીયા, કુંભણ, નાનાજાદરા, લખુપરા, ઉમણીયાવદર, તાવેડા, મહુવા અને કતપર જેવા ગામોનો સમાવેશ થાય છે. આ ગામોના સરપંચો અને ગ્રામજનોને સતત સંપર્કમાં રહેવા અને નદીના કિનારા નજીક પશુધન કે વાહન ન લઈ જવા માટે સૂચના આપવામાં આવી છે. હાલ તંત્ર પરિસ્થિતિ પર સતત નજર રાખી રહ્યું છે અને કોઈપણ કટોકટીનો સામનો કરવા માટે તમામ તૈયારીઓ પૂર્ણ કરી લેવામાં આવી છે.