આયાઝ સિદ્દિકી, કચ્છકચ્છનું વિશ્વવિખ્યાત પ્રવાસન સ્થળ અને કુદરતની અજાયબી સમાન 'રોડ ટુ હેવન' હાલમાં પ્રવાસીઓ માટે નંદનવન સમાન બની ગયું છે. સામાન્ય રીતે માર્ચ મહિનો બેસતાની સાથે જ વિદેશી પક્ષીઓ વતન પરત ફરતા હોય છે, પરંતુ આ વર્ષે નજારો કંઈક અલગ જ છે. ખાવડાથી ધોરાવીરાને જોડતા આ માર્ગની બંને તરફ લાખોની સંખ્યામાં સુરખાબ (ફ્લેમિંગો) એ પડાવ નાખ્યો છે, જે જોઈને એવું લાગે છે કે આ પક્ષીઓ હવે કચ્છના મહેમાન નહીં પણ કાયમી નિવાસી બની ગયા છે.

આ વર્ષે વરસાદ મોડો પડ્યો હોવાથી રણના નીચાણવાળા વિસ્તારોમાં હજુ પણ પૂરતું પાણી ભરાયેલું છે. પાણીની સાથે પક્ષીઓને જરૂરી ખોરાક પણ આસાનીથી મળી રહેતો હોવાથી, માર્ચના આકરા તાપમાં પણ પક્ષીઓએ સ્થળાંતર કરવાનું ટાળ્યું છે. સાયબિરીયા, રશિયા, અફઘાનિસ્તાન અને ઈરાન જેવા પ્રદેશોમાં જ્યારે કડકડતી ઠંડીને કારણે ખોરાકની અછત સર્જાય છે, ત્યારે આ પક્ષીઓ હજારો કિલોમીટરનું અંતર કાપી કચ્છના રણને પોતાનું આશ્રયસ્થાન બનાવે છે.
ઓક્ટોબર-નવેમ્બરમાં પધારતા આ પક્ષીઓ માટે કચ્છનું રણ ફ્લેમિંગો સિટી બની જાય છે. સામાન્ય રીતે એપ્રિલ પછી વતન પરત ફરતા આ પક્ષીઓ આ વખતે ગરમી વચ્ચે પણ 'રોડ ટુ હેવન' પર પાણીમાં ગુલાબી ચાદર પાથરી હોય તેવો અહેસાસ કરાવી રહ્યા છે. પ્રવાસીઓ માટે આ એક દુર્લભ લ્હાવો છે, જ્યાં રણ, રસ્તો અને આકાશી રંગો સાથે ફ્લેમિંગોનું મિલન એક અલૌકિક દ્રશ્ય ખડું કરે છે.