અમિત રાય,મુંબઈ BEST બસમાં મુસાફરી દરમિયાન તમારો મોબાઈલ પણ પળવારમાં ગાયબ થઈ શકે? મુંબઈ પોલીસે એવી જ એક સંગઠિત મોબાઈલ ચોર ગેંગનો પર્દાફાશ કર્યો છે, જે ભીડનો લાભ લઈને મુસાફરોના મોંઘા સ્માર્ટફોન ચોરી કરતી હતી. લાંબી તપાસ બાદ પોલીસે સાત આરોપીઓની ધરપકડ કરી છે અને તેમની પાસેથી લાખો રૂપિયાના 135 મોબાઈલ ફોન જપ્ત કર્યા છે. હવે તપાસ એ દિશામાં ચાલી રહી છે કે શું આ ગેંગ શહેરના અન્ય ચોરીના બનાવોમાં પણ સંડોવાયેલી હતી.
આ સમગ્ર મામલો 6 જૂનનો છે. અંધેરી (પૂર્વ)ના SEEPZ બસ સ્ટોપ પરથી BEST બસ રૂટ નંબર 415માં મુસાફરી કરી રહેલા એક મુસાફરના ખિસ્સામાંથી લગભગ ₹90 હજાર કિંમતનો Samsung Galaxy S25 Ultra મોબાઈલ ચોરી થઈ ગયો હતો. પીડિતે MIDC પોલીસ સ્ટેશનમાં ફરિયાદ નોંધાવતા પોલીસે ગુનો દાખલ કરીને તપાસ શરૂ કરી હતી. શરૂઆતમાં આ એક સામાન્ય મોબાઈલ ચોરીનો કેસ લાગતો હતો, પરંતુ તપાસ આગળ વધતાં એક સંગઠિત ગેંગનો ખુલાસો થયો.
CCTV અને ટેક્નિકલ પુરાવાથી 7 આરોપીઓ ઝડપાયા
કેસની તપાસ દરમિયાન મુંબઈ પોલીસની ક્રાઈમ ડિટેક્શન ટીમે 40થી 45 CCTV ફૂટેજ, ટેક્નિકલ પુરાવા અને બાતમીદારો પાસેથી મળેલી માહિતીના આધારે આરોપીઓ સુધી પહોંચવામાં સફળતા મેળવી. પોલીસે મુમ્બ્રા અને શિવાજી નગર વિસ્તારમાં દરોડા પાડીને કુલ સાત આરોપીઓની ધરપકડ કરી. પ્રાથમિક તપાસમાં સામે આવ્યું કે આ ગેંગ ખાસ કરીને BEST બસોમાં ભીડનો લાભ લઈને મુસાફરોના મોબાઈલ ફોન ચોરી કરતી હતી. પોલીસે જણાવ્યું કે આ કાર્યવાહીથી મોબાઈલ ચોરીના ત્રણ અલગ-અલગ કેસનો પણ ભેદ ઉકેલવામાં સફળતા મળી છે.
135 મોબાઈલ ફોન જપ્ત, અન્ય કેસોમાં પણ તપાસ ચાલુ
ધરપકડ કરાયેલા આરોપીઓ પાસેથી વિવિધ કંપનીઓના કુલ 135 મોબાઈલ ફોન જપ્ત કરવામાં આવ્યા છે. જેની અંદાજિત કિંમત લગભગ 12.67 લાખ છે. પોલીસ હવે તપાસ કરી રહી છે કે આ ગેંગ માત્ર ત્રણ કેસ સુધી મર્યાદિત હતી કે શહેરમાં બનેલી અન્ય મોબાઈલ ચોરીની ઘટનાઓમાં પણ તેની સંડોવણી હતી. અધિકારીઓના જણાવ્યા મુજબ આરોપીઓની સતત પૂછપરછ કરવામાં આવી રહી છે અને ચોરીના મોટા નેટવર્કનો પર્દાફાશ કરવા માટે વધુ તપાસ ચાલી રહી છે. મુંબઈ પોલીસે મુસાફરોને પણ ભીડભાડવાળા જાહેર પરિવહનમાં પોતાના મોબાઈલ અને કિંમતી સામાન પ્રત્યે ખાસ સાવચેત રહેવાની સલાહ આપી છે.