ગુજરાતમાં ગેરકાયદેસર રીતે વસવાટ કરતા વિદેશી નાગરિકો સામે રાજ્ય પોલીસ વિભાગ એક્શન મોડમાં આવી ગયો છે. સરહદી જિલ્લાઓમાં રાષ્ટ્રીય સુરક્ષાને ધ્યાને રાખીને સ્થાનિક વહીવટીતંત્ર અને પોલીસ દ્વારા કડક ચેકિંગ હાથ ધરવામાં આવી રહ્યું છે. આ અંતર્ગત પાટણ જિલ્લા પોલીસે એક મોટી ગુપ્ત માહિતીના આધારે અત્યાર સુધીનું સૌથી મોટું સર્ચ ઓપરેશન હાથ ધરીને ગેરકાયદેસર રીતે રહેતા શંકાસ્પદ નાગરિકોને ઝડપી પાડવામાં મોટી સફળતા મેળવી છે, જેનાથી સ્થાનિક સ્તરે ફફડાટ વ્યાપી ગયો છે.
પાટણ જિલ્લા પોલીસ વડાની સીધી દેખરેખ હેઠળ ગેરકાયદેસર બાંગ્લાદેશી ઘૂસણખોરોને પકડી પાડવા માટે એક ખાસ મેગા ડ્રાઈવનું આયોજન કરવામાં આવ્યું હતું. આ ખાસ ઝુંબેશને 'ઓપરેશન ડેલ્ટા હન્ટ' નામ આપવામાં આવ્યું હતું, જેના અંતર્ગત પોલીસે સમગ્ર જિલ્લામાં એકસાથે દરોડા પાડ્યા હતા. આ ઓપરેશનને સફળ બનાવવા માટે પોલીસે અલગ-અલગ ૨૫ જેટલી સ્પેશિયલ ટીમોનું ગઠન કર્યું હતું, જેમાં સ્થાનિક પોલીસ ઉપરાંત ક્રાઈમ બ્રાન્ચ અને એસઓજીના જવાનોને પણ સામેલ કરવામાં આવ્યા હતા. આ ટીમોએ પૂર્વ આયોજિત વ્યૂહરચના મુજબ જિલ્લાના અલગ-અલગ ૬૮ જેટલા શંકાસ્પદ લોકેશન્સ અને આશ્રયસ્થાનો પર એકસાથે ત્રાટકીને સઘન સર્ચ ઓપરેશન હાથ ધર્યું હતું.
આ વ્યાપક કોમ્બિંગ દરમિયાન પોલીસ ટીમોએ શંકાસ્પદ હિલચાલ અને પૂરતા દસ્તાવેજો ન ધરાવતી ૧૫ જેટલી મહિલાઓને કસ્ટડીમાં લીધી હતી અને તેમની સઘન પૂછપરછ શરૂ કરી હતી. પ્રાથમિક તપાસ અને ઓળખ પત્રોની ઝીણવટભરી ચકાસણીના અંતે આ ૧૫ મહિલાઓમાંથી ૬ મહિલાઓ મૂળ બાંગ્લાદેશની હોવાનું અને ભારતમાં ગેરકાયદેસર રીતે ઘૂસણખોરી કરીને રહેતી હોવાનું સત્તાવાર રીતે સાબિત થયું છે. પકડાયેલી આ તમામ મહિલાઓ કોઈપણ કાયદેસરના વિઝા કે પાસપોર્ટ વિના સ્થાનિક વિસ્તારમાં વસવાટ કરી રહી હતી.
હાલમાં પાટણ પોલીસ દ્વારા આ ગેરકાયદેસર બાંગ્લાદેશી નાગરિકો સામે જુદી-જુદી સુરક્ષા એજન્સીઓ સાથે મળીને જોઈન્ટ ઈન્ટ્રોગેશન (સંયુક્ત પૂછપરછ) ની પ્રક્રિયા શરૂ કરવામાં આવી છે, જેથી એ જાણી શકાય કે તેઓ કોની મદદથી સરહદ પાર કરીને અહીં સુધી પહોંચ્યા હતા. પોલીસના જણાવ્યા અનુસાર, આ જોઈન્ટ ઈન્ટ્રોગેશનની કાયદાકીય પ્રક્રિયા પૂર્ણ થયા બાદ તમામ ઘૂસણખોરોને નિયમ મુજબ તેમના દેશમાં ડીપોર્ટ (પરત મોકલવા) કરવાની કડક કાર્યવાહી હાથ ધરવામાં આવશે. આ સિવાય કસ્ટડીમાં લેવાયેલા અન્ય શંકાસ્પદ વ્યક્તિઓની પણ ઓળખ સાબિત કરવા માટે પોલીસ દ્વારા હાલમાં સઘન કવાયત ચલાવવામાં આવી રહી છે.