પાકિસ્તાન અધિકૃત કાશ્મીર (PoK)માં ઉકળતો જનઆક્રોશ હવે નિર્ણાયક તબક્કે પહોંચી ગયો હોય તેવા સંકેતો મળી રહ્યા છે. વર્ષોથી મોંઘવારી, બેરોજગારી, વીજળીના વધતા દર, જીવનજરૂરી વસ્તુઓની અછત અને વહીવટી તંત્ર સામે અસંતોષ વ્યક્ત કરતા લોકો હવે ખુલ્લેઆમ પાકિસ્તાન સરકારને પડકાર ફેંકી રહ્યા છે. આ વચ્ચે શાંતિપૂર્ણ વિરોધ પ્રદર્શન દરમિયાન પાકિસ્તાની સુરક્ષા દળોએ ગોળીબાર કર્યો હોવાના આરોપોએ સમગ્ર વિસ્તારનું વાતાવરણ વધુ તંગ બનાવી દીધું છે.
JAACનું કહેવું છે કે આ આંદોલન કોઈ રાજકીય લાભ માટે નહીં પરંતુ સામાન્ય નાગરિકોના મૂળભૂત અધિકારો માટે છે. સંગઠનના નેતાઓની ધરપકડ, વહીવટી દમન, મોંઘવારી અને લોકોની રોજિંદી મુશ્કેલીઓ સામે હવે લોકો મૌન રહેવા તૈયાર નથી. ખાસ કરીને શૌકત નવાઝ મીરની ધરપકડ બાદ સમગ્ર PoKમાં અસંતોષ વધુ ભભૂકી ઊઠ્યો હોવાનું સંગઠન દાવો કરે છે.
આ પ્રદર્શનમાં મહિલાઓ, વિદ્યાર્થીઓ, વેપારીઓ અને વૃદ્ધોની મોટી હાજરીએ પણ સૌનું ધ્યાન ખેંચ્યું છે. સોશિયલ મીડિયા પર વાયરલ થઈ રહેલા વીડિયો અને તસવીરોમાં હજારો લોકો સફેદ ઝંડા સાથે રસ્તા પર ઉતરેલા જોવા મળે છે. JAACએ લોકોને શાંતિ જાળવીને વિરોધ નોંધાવવા અપીલ કરી છે, પરંતુ સાથે સ્પષ્ટ કર્યું છે કે હવે લોકો પોતાના અધિકારો માટે કોઈપણ હદ સુધી જવા તૈયાર છે.
આ સમગ્ર ઘટનાક્રમ વચ્ચે સૌથી વધુ ચર્ચા JAAC પ્રમુખના વાયરલ વીડિયોની થઈ રહી છે. વીડિયોમાં તેઓ PoKમાં સર્જાયેલી રાશન અને દવાઓની અછતનો ઉલ્લેખ કરીને સરહદ પાર રહેતા કાશ્મીરીઓને માનવીય મદદ માટે અપીલ કરે છે. તેમણે કહ્યું કે લોકો મુશ્કેલ પરિસ્થિતિમાં જીવન જીવી રહ્યા છે અને હવે એકબીજાની મદદ કરવાની જરૂર છે.
વાયરલ વીડિયોમાં તેમણે નિયંત્રણ રેખા (LoC) અંગે પણ મોટું નિવેદન આપ્યું છે. તેમણે કહ્યું કે કાશ્મીરીઓ વચ્ચેની દિવાલો દૂર થવી જોઈએ અને લોકો એકબીજાની મદદ માટે આગળ આવે. તેમના આ નિવેદન બાદ સોશિયલ મીડિયા અને રાજકીય વર્તુળોમાં નવી ચર્ચા શરૂ થઈ છે.
બીજી તરફ, Pakistan Tehreek-e-Insaf (PTI)ની PoJK યુનિટે પણ ગોળીબારમાં એક વ્યક્તિના મોત અને અનેક લોકો ઘાયલ થયાનો દાવો કર્યો છે. જોકે, મૃત્યુઆંક અને અન્ય વિગતોની સ્વતંત્ર રીતે પુષ્ટિ થઈ શકી નથી.
છેલ્લા કેટલાક મહિનાઓથી PoKમાં લોકોનો અસંતોષ સતત વધી રહ્યો છે. અગાઉ પણ વીજળીના વધતા બિલ, મોંઘવારી અને વહીવટી તંત્ર સામે અનેક વખત વિરોધ પ્રદર્શન થયા હતા. હવે ગોળીબારના આરોપો સામે આવતા આ આંદોલન વધુ ઉગ્ર બનવાની શક્યતા વ્યક્ત કરવામાં આવી રહી છે.
જો આ સ્થિતિનો રાજકીય અને વહીવટી સ્તરે વહેલી તકે ઉકેલ નહીં આવે, તો PoKમાં જનઆંદોલન વધુ વ્યાપક સ્વરૂપ ધારણ કરી શકે છે. હાલ સમગ્ર ઘટનાક્રમ પર સ્થાનિક લોકો ઉપરાંત આંતરરાષ્ટ્રીય સ્તરે પણ નજર રાખવામાં આવી રહી છે. જોકે, ગોળીબાર, મૃત્યુ અને અન્ય દાવાઓ અંગે સ્વતંત્ર પુષ્ટિ તથા પાકિસ્તાની સત્તાવાળાઓનું વિગતવાર સત્તાવાર નિવેદન હજુ બાકી છે.