ગુજરાતમાં સગીરવયની દીકરીઓની સુરક્ષાને લઈને વારંવાર સવાલો ઉભા થઈ રહ્યા છે. તાજેતરમાં સાબરકાંઠા જિલ્લાના વડાલી પંથકમાં બનેલી એક ઘટનાએ સમગ્ર સમાજને હચમચાવી દીધો છે. વડાલીના ગ્રામ્ય વિસ્તારમાંથી 16 વર્ષની સગીરાનું અપહરણ કરીને સુરત લઈ જઈ તેની સાથે દુષ્કર્મ આચરવામાં આવતા ભારે ચકચાર મચી જવા પામી છે. લગ્નની લાલચ આપીને સગીરાને ફસાવનાર હવસખોર અજય સામે પોલીસે પોક્સો (POCSO) અને દુષ્કર્મની ગંભીર કલમો હેઠળ ગુનો નોંધી વધુ તપાસ હાથ ધરી છે.

આ ઘટનાની વિગત મુજબ, સાબરકાંઠાના વડાલી વિસ્તારની એક 16 વર્ષીય સગીરાને આરોપી અજયે લગ્નની જાળમાં ફસાવી હતી. પ્રેમના નામે વિશ્વાસ કેળવીને નરાધમ આરોપીએ સગીરાનું અપહરણ કર્યું હતું અને તેને સુરત લઈ ગયો હતો. સુરતમાં લઈ જઈને આરોપીએ સગીરાની મજબૂરીનો ફાયદો ઉઠાવી તેની સાથે અનેકવાર શરીર સંબંધ બાંધ્યા હોવાનું સામે આવ્યું છે. સગીરા પરિવારથી દૂર નરાધમના ચંગુલમાં ફસાયેલી હતી, જ્યારે તેના સ્વજનો દીકરીની શોધખોળ કરી રહ્યા હતા.
પરિવારે વડાલી પોલીસ મથકે સગીરાના અપહરણની ફરિયાદ નોંધાવ્યા બાદ પોલીસ એક્શન મોડમાં આવી હતી. ટેકનિકલ સર્વેલન્સ અને બાતમીના આધારે પોલીસે તપાસનો ધમધમાટ શરૂ કર્યો અને અંતે સુરતથી આરોપી અજયને ઝડપી પાડ્યો હતો. આરોપીની ધરપકડ બાદ પોલીસે સગીરાને મુક્ત કરાવી તેને સુરક્ષિત રીતે પરિવારને સોંપી છે. આ ઘટના બાદ વિસ્તારમાં ભારે આક્રોશની લાગણી જોવા મળી રહી છે.
વધતી જતી આવી ઘટનાઓ વાલીઓ માટે લાલબત્તી સમાન છે. લગ્નની લાલચ આપી સગીરાઓને પ્રેમજાળમાં ફસાવવી અને ત્યારબાદ તેમનું શોષણ કરવાની ઘટનાઓ અટકવાનું નામ નથી લઈ રહી. સમાજમાં આવા નરાધમો સામે કડકમાં કડક કાર્યવાહી થાય તે સમયની માંગ છે. હાલમાં વડાલી પોલીસે આરોપીને કસ્ટડીમાં લઈને સમગ્ર મામલે ઊંડાણપૂર્વક તપાસ હાથ ધરી છે, જેથી આ કૃત્યમાં અન્ય કોઈની સંડોવણી છે કે કેમ તે જાણી શકાય.