સુરત શહેરના ઉત્રાણ વિસ્તારમાં પોલીસે દારૂની હેરાફેરી કરતા એક મોટા રેકેટનો પર્દાફાશ કર્યો છે. કઠોરગામની માનસરોવર રેસિડેન્સીમાં કરવામાં આવેલા દરોડા દરમિયાન પોલીસે લાખો રૂપિયાનો વિદેશી દારૂનો જથ્થો ઝડપી પાડ્યો છે. આ સફળ ઓપરેશનમાં પોલીસે ૩ આરોપીઓની ઘટનાસ્થળેથી ધરપકડ કરી છે, જ્યારે મુખ્ય આરોપીઓ સહિત ૨ વ્યક્તિઓને વોન્ટેડ જાહેર કરી તેમની શોધખોળ હાથ ધરી છે.
આ કેસમાં ધરપકડ કરાયેલા આરોપીઓમાં દેવ ઉર્ફે દેવો રાઠોડ, દેવેન્દ્ર મદેશીયા અને અર્જુન અડાવનો સમાવેશ થાય છે. પૂછપરછ દરમિયાન જાણવા મળ્યું હતું કે, પકડાયેલ આરોપી દેવેન્દ્ર મદેશીયા અગાઉ પણ નવસારી રૂરલ અને પારડી પોલીસ સ્ટેશનમાં પ્રોહિબિશનના ગુનામાં સંડોવાયેલો છે. પોલીસ તપાસમાં સામે આવ્યું છે કે, આ દારૂનો જથ્થો મંગાવનાર મેહુલ સભાડ અને દારૂ સપ્લાય કરનાર મુકેશ પટેલ ઉર્ફે નાનીયો સહિતના અન્ય બે ઈસમો ફરાર છે. પોલીસે આ વોન્ટેડ આરોપીઓને પકડવા માટે તપાસના ચક્રો ગતિમાન કર્યા છે.