તાપી જિલ્લામાંથી પસાર થતા નેશનલ હાઈવે પરથી એક ચોંકાવનારો કિસ્સો સામે આવ્યો છે, જ્યાં ચોમાસાની શરૂઆતના પ્રથમ વરસાદમાં જ તંત્રની નબળી કામગીરીના ધજાગરા ઉડી ગયા છે. વાપીથી શામળાજીને જોડતા નેશનલ હાઈવે પર ડોલવણ તાલુકાના ગડત ગામ પાસેથી પસાર થતા માર્ગ પર એક મોટો અકસ્માત સર્જાય તેવી સ્થિતિ ઊભી થઈ છે. અહીં હાઈવે પર તાજેતરમાં જ લાખો-કરોડોના ખર્ચે બનેલા એક નવા માયનોર બ્રિજ પર પહેલા જ વરસાદે મસમોટો ભૂવો પાડી દીધો છે, જેને પગલે સ્થાનિકોમાં તંત્ર સામે ભારે રોષ જોવા મળી રહ્યો છે.
તંત્રની બેદરકારી સામે ઉઠ્યા સવાલોનવા નક્કોર બ્રિજની આટલી દયનીય હાલત થતાં નેશનલ હાઈવે ઓથોરિટીની કામગીરી અને તેની ગુણવત્તા સામે અનેક ગંભીર સવાલો ઊભા થયા છે. વરસાદી માહોલ વચ્ચે હાઈવે પર પડેલો આ ભૂવો ગમે ત્યારે કોઈ મોટા અકસ્માતને આમંત્રણ આપી શકે છે. સ્થાનિકોએ આ મામલે તાત્કાલિક તપાસ કરીને દોષિત કોન્ટ્રાક્ટરો સામે કડક પગલાં ભરવાની માંગ કરી છે. હાલમાં આ માર્ગ પરથી પસાર થતા વાહનચાલકોને સાવચેતી રાખવા માટે અપીલ કરવામાં આવી છે.