વડોદરા શહેરના અટલાદરા વિસ્તારમાંથી એક આગની ઘટના સામે આવી છે. અટલાદરામાં આવેલી એક જાણીતી ખાનગી હોસ્પિટલની બિલકુલ નજીક આવેલી એક નિર્માણધીન બિલ્ડિંગમાં અચાનક ભીષણ આગ ફાટી નીકળી હતી. આગ એટલી વિકરાળ હતી કે તેના ધુમાડાના કાળા ડિબાંગ ગોટેગોટા અડધો કિલોમીટર દૂર સુધી આકાશમાં ઉડતા દેખાયા હતા, જેને પગલે સ્થાનિકો અને હોસ્પિટલમાં હાજર દર્દીઓના સગા-સંબંધીઓમાં ભારે ભય વ્યાપી ગયો હતો.
ફાયર ફાઈટરોએ સતત પાણીનો મારો ચલાવીને કલાકોની ભારે જહેમત બાદ આગ પર સંપૂર્ણ કાબૂ મેળવ્યો હતો. સદનસીબે આ દુર્ઘટનામાં કોઈ જાનહાનિના સમાચાર નથી, જે એક મોટી રાહતની વાત છે. જોકે, આગના કારણે આસપાસના વાતાવરણમાં થોડો સમય માટે પ્રદૂષણ અને ગભરાટનો માહોલ જોવા મળ્યો હતો. પોલીસ અને ફાયર વિભાગ દ્વારા હાલ આગ લાગવાનું ચોક્કસ કારણ જાણવા તપાસ હાથ ધરવામાં આવી છે.