MORBI:મોરબી એન.ડી.પી.એસ. ગુનાનો નાસતો-ફરતો આરોપી ઝડપાયો

મોરબી ડિસ્ટ્રિક્ટ પોલીસ વડાની સૂચના અને માર્ગદર્શન હેઠળ નાસતા-ફરતા આરોપીઓને પકડી પાડવા માટે ચલાવવામાં આવી રહેલી ઝુંબેશ અંતર્ગત મોરબી એસ.ઓ.જી. સ્ટાફને એક મહત્વની સફળતા મળી છે. વાકાનેર સીટી પોલીસ સ્ટેશનમાં નોંધાયેલા એન.ડી.પી.એસ. (NDPS) એક્ટ હેઠળના ગુનામાં લાંબા સમયથી પકડવાના બાકી રહેલા એક આરોપીને એસ.ઓ.જી.ની ટીમે બાતમીના આધારે ઝડપી લીધો છે.

મળતી માહિતી મુજબ, મોરબી એસ.ઓ.જી. સ્ટાફ પેટ્રોલીંગમાં હતો તે દરમિયાન ખાનગી રાહે ચોક્કસ બાતમી મળી હતી કે, વાકાનેર સીટી પોલીસ મથકના કેફી દ્રવ્યોના ગુનામાં સંડોવાયેલ અને નાસતો-ફરતો આરોપી સોહિલભાઇ અનવરભાઇ પઠાણ (રહે. મોરબી) હાલ મોરબી વિસ્તારમાં જ હાજર છે. આ બાતમીના આધારે એસ.ઓ.જી.ની ટીમે તાત્કાલિક વોચ ગોઠવીને આરોપી સોહિલ પઠાણને દબોચી લીધો હતો.

એસ.ઓ.જી. ટીમે આરોપીની અટકાયત કરી તેની સઘન પૂછપરછ હાથ ધરી હતી. ત્યારબાદ કાયદેસરની આગળની કાર્યવાહી અને ઔપચારિક ધરપકડ માટે આરોપી સોહિલ પઠાણને વાકાનેર સીટી પોલીસ સ્ટેશનને સોંપવામાં આવ્યો છે.