ಬೇಸಿಗೆ ತೀವ್ರಗೊಳ್ಳುತ್ತಿದ್ದಂತೆ ದೇಹಕ್ಕೆ ತಂಪು ನೀಡುವ ನಿಂಬೆರಸದ ಬೇಡಿಕೆ ಹೆಚ್ಚಾಗುತ್ತದೆ. ಆದರೆ ಇದೇ ಸಮಯದಲ್ಲಿ ನಿಂಬೆಕಾಯಿಗಳ ಬೆಲೆ ಏರಿಕೆಯಾಗುವುದು ಮತ್ತು ಕೆಲವೇ ದಿನಗಳಲ್ಲಿ ಅವು ಒಣಗಿ ರಸ ಕಳೆದುಕೊಳ್ಳುವುದು ಗೃಹಿಣಿಯರಿಗೆ ಸಮಸ್ಯೆಯಾಗುತ್ತಿದೆ.

ಸಾಮಾನ್ಯವಾಗಿ, ನಿಂಬೆಕಾಯಿಗಳು 3-4 ದಿನಗಳಲ್ಲೇ ತೇವಾಂಶ ಕಳೆದುಕೊಂಡು ಒಣಗುತ್ತವೆ.

ಆದರೆ ಕೆಲವು ಸರಳ ವಿಧಾನಗಳನ್ನು ಅನುಸರಿಸಿದರೆ ಅವುಗಳನ್ನು ಹೆಚ್ಚು ದಿನಗಳ ಕಾಲ ತಾಜಾಗಿರಿಸಬಹುದು ಎಂದು ತಜ್ಞರು ಸಲಹೆ ನೀಡುತ್ತಾರೆ.

ಎಣ್ಣೆ ಬಳಸಿ ಸಂರಕ್ಷಣೆ:
ನಿಂಬೆಕಾಯಿಗಳ ತೊಗಟೆಯಲ್ಲಿ ಇರುವ ಸೂಕ್ಷ್ಮ ರಂಧ್ರಗಳಿಂದ ತೇವಾಂಶ ಹೊರಹೋಗುವುದರಿಂದ ಅವು ಒಣಗುತ್ತವೆ. ಇದನ್ನು ತಡೆಯಲು ಎಣ್ಣೆ ಸಹಕಾರಿ. ಮೊದಲು ನಿಂಬೆಕಾಯಿಗಳನ್ನು ಸ್ವಚ್ಛವಾಗಿ ತೊಳೆದು ಒಣಗಿಸಿ, ಬಳಿಕ ಸ್ವಲ್ಪ ತೆಂಗಿನ ಎಣ್ಣೆ ಅಥವಾ ಆವ ಎಣ್ಣೆಯನ್ನು ತೆಳುವಾಗಿ ಲೇಪಿಸಬೇಕು. ನಂತರ ಅವನ್ನು ಏರ್‌ಟೈಟ್ ಡಬ್ಬಿಯಲ್ಲಿ ಇಟ್ಟು ಫ್ರಿಜ್‌ನಲ್ಲಿ ಇರಿಸಿದರೆ ತೇವಾಂಶ ಉಳಿದುಕೊಂಡು ಹೆಚ್ಚು ದಿನ ತಾಜಾಗಿರುತ್ತವೆ.

ನೀರಿನಲ್ಲಿ ಶೇಖರಣೆ ವಿಧಾನ:
ತಾಜಾ ನಿಂಬೆಕಾಯಿಗಳನ್ನು ಒಂದು ಗಾಜಿನ ಪಾತ್ರೆಯಲ್ಲಿ ಹಾಕಿ ಸಂಪೂರ್ಣವಾಗಿ ನೀರಿನಲ್ಲಿ ಮುಳುಗುವಂತೆ ಮಾಡಬೇಕು. ನಂತರ ಪಾತ್ರೆಗೆ ಮುಚ್ಚಳ ಹಾಕಿ ಫ್ರಿಜ್‌ನಲ್ಲಿ ಇಡಬೇಕು. ಪ್ರತಿ 7-10 ದಿನಗಳಿಗೊಮ್ಮೆ ನೀರನ್ನು ಬದಲಾಯಿಸಿದರೆ ನಿಂಬೆಕಾಯಿಗಳು ಹಲವು ವಾರಗಳವರೆಗೆ ತಾಜಾಗಿರುತ್ತವೆ.

ದೀರ್ಘಕಾಲ ಶೇಖರಣೆ ವಿಧಾನ:
ಹೆಚ್ಚು ದಿನಗಳ ಕಾಲ ಬಳಸಲು ನಿಂಬೆಕಾಯಿಗಳನ್ನು ತುಂಡುಗಳಾಗಿ ಕತ್ತರಿಸಿ, ಅದಕ್ಕೆ ಉಪ್ಪು ಹಾಕಿ ಚೆನ್ನಾಗಿ ಮಿಶ್ರಣ ಮಾಡಬೇಕು. ಈ ತುಂಡುಗಳನ್ನು ಗಾಜಿನ ಸೀಸೆಯಲ್ಲಿ ತುಂಬಿ ಫ್ರಿಜ್‌ನಲ್ಲಿ ಇಟ್ಟರೆ, ರುಚಿ ಉಳಿಸಿಕೊಂಡೇ ತಿಂಗಳ ಕಾಲ ಬಳಸಬಹುದು.