ಬೆಂಗಳೂರು: ಜರ್ಮನ್ ಭಾಷಾ ಪ್ರಮಾಣಪತ್ರವನ್ನು ಪರೀಕ್ಷೆ ಇಲ್ಲದೆ ಪಡೆಯಬಹುದೆಂಬ ಆಮಿಷಕ್ಕೆ ಬಲಿಯಾಗಿ ಬೆಂಗಳೂರಿನ ಖಾಸಗಿ ಆಸ್ಪತ್ರೆಯ ಉದ್ಯೋಗಿಯೊಬ್ಬರು 3.67 ಲಕ್ಷ ರೂಪಾಯಿ ಕಳೆದುಕೊಂಡಿರುವ ಘಟನೆ ಬೆಳಕಿಗೆ ಬಂದಿದೆ.

34 ವರ್ಷದ ಪಶ್ಚಿಮ ಬಂಗಾಳ ಮೂಲದ ಈ ವ್ಯಕ್ತಿ, ಬೆಂಗಳೂರಿನ ಖ್ಯಾತ ಖಾಸಗಿ ಆಸ್ಪತ್ರೆಯಲ್ಲಿ ಉದ್ಯೋಗದಲ್ಲಿದ್ದು, ಜರ್ಮನ್ ಭಾಷೆಯ B1 ಹಂತದ ಕೋರ್ಸ್ ಪೂರ್ಣಗೊಳಿಸಿದ್ದರು.

ಜರ್ಮನಿಗೆ ಉದ್ಯೋಗಾವಕಾಶಗಳಿಗಾಗಿ ಪ್ರಯತ್ನಿಸುತ್ತಿದ್ದ ಇವರಿಗೆ ಫೇಸ್‌ಬುಕ್‌ನಲ್ಲಿ ಪರೀಕ್ಷೆ ಬರೆಯದೇ ಪ್ರಮಾಣಪತ್ರ ನೀಡುವುದಾಗಿ ಭರವಸೆ ನೀಡಿದ ಜಾಹೀರಾತು ಗಮನ ಸೆಳೆದಿದೆ.

ಜಾಹೀರಾತಿನ ಮೂಲಕ ಸಂಪರ್ಕಿಸಿದ ವಂಚಕರು ಬಳಿಕ ವಾಟ್ಸ್‌ಆಪ್ ಮೂಲಕ ಸಂವಾದ ನಡೆಸಿ, ಪ್ರಮಾಣಪತ್ರ ನೀಡಲು 700 ಯೂರೋ ಪ್ರೊಸೆಸಿಂಗ್ ಶುಲ್ಕ ಪಾವತಿಸಬೇಕೆಂದು ತಿಳಿಸಿದ್ದಾರೆ. ಹಂತ ಹಂತವಾಗಿ ಹಣ ಪಾವತಿಸಿದರೂ ಪ್ರಮಾಣಪತ್ರ ನೀಡದೇ ಮತ್ತಷ್ಟು ಹಣದ ಬೇಡಿಕೆ ಇಟ್ಟಿದ್ದು, ಇದರಿಂದ ಅನುಮಾನಗೊಂಡ ಸಂತ್ರಸ್ತರು ತಾವು ವಂಚನೆಗೆ ಒಳಗಾಗಿರುವುದನ್ನು ಅರಿತು ಜೆ.ಬಿ. ನಗರ ಪೊಲೀಸ್ ಠಾಣೆಗೆ ದೂರು ನೀಡಿದ್ದಾರೆ.

ವಂಚಕರು ತಮ್ಮನ್ನು ನೈಜ ಸಂಸ್ಥೆಯಂತೆ ತೋರಿಸಲು ಮಹಿಳೆಯೊಬ್ಬರು ಸೇರಿದಂತೆ ನಾಲ್ವರು ಭಾರತೀಯ ಹಾಗೂ ಜರ್ಮನ್ ಸಿಮ್ ಕಾರ್ಡ್‌ಗಳನ್ನು ಬಳಸಿ ವಾಟ್ಸ್‌ಆಪ್ ಮೂಲಕ ಸಂಪರ್ಕಿಸಿದ್ದರೆಂದು ತಿಳಿದುಬಂದಿದೆ. ಅಲ್ಲದೆ ಇನ್‌ಸ್ಟಾಗ್ರಾಂ ಗುಂಪುಗಳಿಗೂ ಸೇರಿಸಿ, ಅಲ್ಲಿ ಕೆಲವರು ಪ್ರಮಾಣಪತ್ರ ಪಡೆದಿರುವುದಾಗಿ ನಕಲಿ ಪ್ರತಿಕ್ರಿಯೆಗಳನ್ನು ಹಂಚಿಕೊಂಡಿದ್ದರು ಎಂದು ಸಂತ್ರಸ್ತರು ತಿಳಿಸಿದ್ದಾರೆ.