ಉಡುಪಿ: ಜಿಲ್ಲೆಯ ಕೋಟೆ ಮತ್ತು ಮಟ್ಟು ಭಾಗಗಳಲ್ಲಿ ಹರಿಯುವ ಪಿನಾಕಿನಿ ಹೊಳೆ ಇದೀಗ ಸ್ಥಳೀಯರಿಗೆ ಭಯದ ಕಾರಣವಾಗಿದೆ. ವರ್ಷಗಳಿಂದ ಹೊಳೆಯ ಮಧ್ಯದಲ್ಲಿ ಹೂಳು ತುಂಬಿಕೊಂಡಿರುವುದರಿಂದ ನೀರಿನ ಹರಿವಿನ ದಿಕ್ಕು ಬದಲಾಗಿದ್ದು, ತೀರ ಪ್ರದೇಶಗಳಲ್ಲಿ ತೀವ್ರ ಭೂ ಕೊರೆತ ಉಂಟಾಗಿದೆ.
ಪರೆಂಕುದ್ರು ಮತ್ತು ಮಟ್ಟು ಕಟ್ಟದ ನಿವಾಸಿಗಳ ಪ್ರಕಾರ, ಈಗಾಗಲೇ ಸುಮಾರು 10 ರಿಂದ 15 ಮೀಟರ್‌ಗೂ ಹೆಚ್ಚು ಭೂಮಿ ಹೊಳೆ ಪಾಲಾಗಿದ್ದು, ನೂರಾರು ತೆಂಗಿನ ಮರಗಳು ನೀರಿನಲ್ಲಿ ಕೊಚ್ಚಿಹೋಗಿವೆ. ಮನೆಗಳಲ್ಲಿ ಬಿರುಕುಗಳು ಕಾಣಿಸಿಕೊಂಡಿದ್ದು, ಮಳೆಗಾಲ ಎದುರಿಸುವುದು ದೊಡ್ಡ ಆತಂಕವಾಗಿದೆ.
ಉಬ್ಬರದ ಸಂದರ್ಭದಲ್ಲಿ ಸಮುದ್ರದ ಉಪ್ಪು ನೀರು ಹೊಳೆಗೆ ನುಗ್ಗಿ ಬಾವಿ ನೀರು ಉಪ್ಪಾಗುತ್ತಿರುವುದು, ಜೊತೆಗೆ ಪ್ರವಾಹದ ವೇಳೆ ವಿಷಜಂತುಗಳು ಮನೆಗಳಿಗೆ ನುಗ್ಗುತ್ತಿರುವುದು ಮತ್ತೊಂದು ಸಮಸ್ಯೆಯಾಗಿ ಪರಿಣಮಿಸಿದೆ. ಗ್ರಾಮಸ್ಥರು ತಕ್ಷಣ ಹೂಳು ತೆರವುಗೊಳಿಸಿ ತೀರ ರಕ್ಷಣೆಗೆ ಕ್ರಮ ಕೈಗೊಳ್ಳಬೇಕೆಂದು ಜಿಲ್ಲಾಡಳಿತವನ್ನು ಒತ್ತಾಯಿಸಿದ್ದಾರೆ.